Britaniya tashqi ishlar vaziri o‘z lavozimidan ozod etildi. “Tolibon” Kobulni egallayotgan paytda u Kritda dam olayotgan edi

Buyuk Britaniya bosh vaziri Boris Jonson mamlakat hukumatida bir qator o‘zgarishlarni amalga oshirdi, jumladan, tashqi ishlar vaziri Dominik Raabni lavozimidan chetladi. Bu haqda BBC News xabar berdi.

Raabning o‘rnini Elizabet Trass egalladi, bungacha u xalqaro savdo vaziri bo‘lib ishlardi. Trass Britaniya tarixida tashqi ishlar vaziri etib tayinlangan ikkinchi ayol bo‘ldi.

Shu bilan birga, Raab bosh vazir o‘rinbosari sifatida, shuningdek, Maykl Gouvning o‘rniga adliya vaziri lavozimini egallab, hukumatda qoldi. Gouv, o‘z navbatida, uy-joy qurilish vaziri bo‘ldi, Robert Jenrik bu lavozimdan chetlatildi. Gouv, shuningdek, Buyuk Britaniyadagi saylovlar va munosabatlar uchun vazirlik majburiyatini saqlab qoladi.

Bundan tashqari, Jonson Gevin Uilyamsonni ta’lim vaziri lavozimidan ozod qildi. Uning o‘rniga Nadim Zaxavi tayinlandi.

Dominik Raab Buyuk Britaniya tashqi ishlar vazirligini 2019-yil iyuldan buyon boshqarib kelayotgan edi. So‘nggi haftalarda Raab Afg‘onistonda “Tolibon” hujumlari ketayotgan paytdagi xatti-harakatlari uchun qattiq tanqid qilindi. “Tolibon” Kobulni qo‘lga olgan paytda Raab Krit orolida ta’tilda bo‘lgan, keyinchalik ma’lum bo‘lishicha, u britaniyaliklarga yordam bergan afg‘on tarjimonlarini evakuatsiya qilish bo‘yicha Afg‘oniston Tashqi ishlar vazirligi bilan bog‘lanmagan. Shuningdek, Afg‘onistonni tark etish uchun yordam so‘rab murojaat qilgan odamlarning minglab xatlarini o‘qimagan.

Reuters xabariga ko‘ra, Boris Jonson turmush darajasi va daromadlarning pandemiyadan oldingi holatga sekin qaytayotgani tufayli hukumat harakatlaridan umumiy norozilik fonida Vazirlar Mahkamasi tarkibini o‘zgartirgan.

Eslatib o‘tamiz, Buyuk Britaniyaning Afg‘onistondagi elchisi Lori Bristou “Tolibon” hokimiyatni qo‘lga kiritgandan keyin mamlakatni tark etishi kerak edi, lekin u britaniyaliklarga va Britaniya hukumati bilan aloqasi bor afg‘onlarga yordam berish uchun qolgan. 15-avgust kuni Bristou Britaniya elchixonasi ko‘chirib kelingan Kobul aeroportida afg‘onlarga shaxsan o‘zi viza bergan.

Avvalroq Buyuk Britaniya Afg‘onistondan evakuatsiya qilingan afg‘onlarga o‘z hududida doimiy yashash huquqini berishi haqida xabar qilingandi.