Samarqandda Cobalt haydab ketayotgan voyaga yetmagan bola yo‘l chetida to‘xtab turgan 3 ta mashinaga borib urilib, YTH sodir etdi.

Foto: Samarqand IIB YHXB matbuot xizmati

Viloyat IIB YHXB xabariga ko‘ra, voqea 2021-yil 14-sentabr kuni soat 12:30 larda yuz bergan. 17 yoshli S.M. Cobalt’ni Samarqand shahrining Mirzo Ulug‘bek ko‘chasi tomonidan Gagarin—Amir Temur ko‘chasi tomonga haydab ketayotib, boshqaruvni yo‘qotishi natijasida yo‘lning o‘ng tomon chetki qismida to‘xtab turgan Nexia, Nexia-2 hamda Matiz avtomashinalariga borib urilgan.

Oqibatda avtomashinalar oralig‘ida turgan I.S. tan jarohati olib, Respublika shoshilinch tibbiy yordam ilmiy markazi Samarqand filialiga murojaat qilgan. Samarqandning STV telekanali bergan ma’lumotda esa ikki kishi: hodisa vaqtida mashinaga o‘tirmoqchi bo‘lgan erkak va mashina ichida bo‘lgan 8 yoshli bola jabrlangani qayd etilgan.

YTH oqibatida avtomashinalarga moddiy zarar yetkazilgan.

Ayni paytda holat yuzasidan Samarqand shahri bo‘yicha IIO FMB YHXB tomonidan surishtiruv harakatlari olib borilmoqda.