O‘zbekistonda 26-sentabr Davlat xavfsizlik xizmati organlari xodimlari kuni etib belgilandi. Adliya vazirligi matbuot xizmatining xabar berishicha, 14-sentabr kuni Prezident bu haqda tegishli qonunni imzoladi.
Bunga qadar 2018-yil 2-oktabrdagi “O‘zbekiston Respublikasi Davlat xavfsizlik xizmati kunini belgilash to‘g‘risida”gi qonunga ko‘ra, DXX kasb bayrami 5-aprel kuni nishonlanar edi.
Eslatib o‘tamiz, Senat yangi qonunni avgust oxirlarida ma’qullagan edi. Hujjat loyihasi muhokamasida senatorlar DXX tarixi aslida O‘zbekiston SSR Davlat xavfsizligi Ittifoq — respublika komiteti tugatilib, Milliy xavfsizlik boshqarmasi tuzilishi belgilangan 1991-yil 26-sentabrdagi Prezident farmoniga borib taqalishini qayd etgan edi.
“O‘zbekiston Respublikasi Milliy xavfsizlik boshqarmasi birinchi navbatda razvedka, kontrrazvedka va uyushgan jinoyatchilikka qarshi kurash bilan shug‘ullanishi kerakligi belgilab qo‘yilsin. Sobiq Davlat xavfsizligi komitetining yuqorida sanab o‘tilgan vazifalar bilan bog‘liq bo‘lmagan va O‘zbekiston Respublikasi Konstitutsiyasiga zid barcha tuzilma, bo‘linmalari va bo‘limlarini tugatish ko‘zda tutilsin”, — deyilgan edi farmonda.
“Shu bois O‘zbekiston Respublikasi davlat mustaqilligining 30 yillik bayrami nishonlanganidan so‘ng, 26-sentabr kuni Davlat xavfsizlik xizmatining 30 yilligini o‘tkazish mantiqan to‘g‘ri hisoblanadi.
Ushbu qonun qabul qilinishi natijasida 2018-yil 2-oktabrda qabul qilingan ‘O‘zbekiston Respublikasi Davlat xavfsizlik xizmati kunini belgilash to‘g‘risida’gi qonun o‘z kuchini yo‘qotadi va 26-sentabr tarixiy sanasi asosida yurtimizda O‘zbekiston Respublikasi Davlat xavfsizlik xizmati organlari xodimlari kuni sifatida nishonlanadi”, — deya qayd etilgan edi Senat axborotida.
Izoh (0)