Sea Shepherd tabiatni muhofaza qilish tashkiloti xabar qilishicha, 12-sentabr, yakshanba kuni tunda Farer orollarida Atlantika oq biqinli delfinlariga ommaviy ov uyushtirilgan. Skalafyordur qishlog‘idagi plyaj yaqinida ov ishtirokchilari tezyurar katerlar va gidrotsikllar yordamida bir necha soat ichida delfinlarning katta to‘dasini sayozlikka olib chiqdi va ularning 1428 tasini o‘ldirdi, deb yozadi Meduza.
Foto: Sea Shepherd
Farer orollari — Atlantika okeanining shimoliy qismida, Shotlandiya va Islandiya o‘rtasida joylashgan muxtor hudud va orollar guruhi bo‘lib, Daniya tarkibiga kiradi.
Sea Shepherd’da ma’lum qilishlaricha, bu kit ovlash sanoatiga an’anaviy tarzda ruxsat berilgan Farer orollarida delfinlarga nisbatan uyushtirilgan eng katta ov bo‘lgan. Tashkilot ma’lumotlariga qaraganda, shu paytgacha 1940-yildagi ov eng ommaviy bo‘lib hisoblangan, o‘shanda 1200 ta qora delfin yoppasiga o‘ldirilgan edi. Sea Shepherd taxmin qilishicha, 12-sentabrdagi ov kitsimonlarga nisbatan uyushtirilgan butun dunyodagi eng yirik qotillik bo‘lgan.
Farer orollarida grindadrap — kit ovi an’anasi tarqalgan bo‘lib, unda mahalliy jamoalar vakillari qatnashishi mumkin. 1980-yillardan buyon uni taqiqlash tarafdori bo‘lib kelayotgan Sea Shepherd tashkiloti qayd etishicha, joriy ov noqonuniy bo‘lgan. Bu hududdagi grindadrapni tashkil qilgan shaxs 12-sentabr kuni Salafyordur yaqinida ov o‘tkazilishi rejalashtirilayotganidan bexabar bo‘lgan — uni boshqa tumandan kelgan odam uyushtirgan. Mahalliy tashkilotchi ovga ruxsat bermagan.
Bo‘lib o‘tgan ov ishtirokchilarining ko‘pchiligi litsenziyaga ega bo‘lmagan, bunday litsenziyalar delfinlarni tezkorlik bilan o‘ldirish bo‘yicha o‘quv kurslarini bitirgan odamlarga beriladi. O‘sha tunda olingan foto va videotasvirlar guvohlik berishicha, qirg‘oqqa chiqarib tashlangan yarador delfinlarning aksariyati tirik bo‘lgan va qimirlashda davom etgan. Shuningdek, ba’zi delfinlar motorli qayiqlarning eshkak vintlaridan jarohat olgan, oqibatda asta-sekinlik bilan va azob chekkan holda vafot etgan.
Odatda grindadrap chog‘ida o‘ldirilgan kit va delfinlar go‘shti ov ishtirokchilari o‘rtasida taqsimlanadi, qolgan qismi mahalliy aholiga beriladi. “Ammo bu safar, — deya qayd etadi Sea Shepherd, — go‘sht shunchalik ko‘pligidan uni tashlab yubormaslik uchun boshqa hududlarda yashovchi aholiga taklif qilishgan”.
Farer orollarida kit ovlash sanoati IX asrda rivojlangan. Arxipelag aholisi kit va delfinlar go‘shtini o‘z ratsionining muhim qismi, ularni ovlashni esa madaniyatning bir bo‘lagi deb hisoblaydi.
