Kobul aeroportida ayollar o‘z ishiga qaytdi

Kobuldagi Hamid Karzay nomli xalqaro aeroportda ayollar yana o‘z ishlariga qaytdi, deb yozadi Anadolu agentligi.

Foto: Anadolu Agency

31-avgust kuni Amerika qo‘shinlari Afg‘onistondan to‘liq olib ketilganidan keyin aeroport “Tolibon” harakati nazorati ostiga o‘tgan edi, endi havo bandargohi asta-sekinlik bilan normal ish faoliyatiga qaytmoqda.

Aeroport ma’muriyati xabariga ko‘ra, 30 ga yaqin ayollar turli departamentlardagi ish joylariga qaytgan. Yaqin kunlarda ularning soni 60 nafargacha ortadi.

Aeroport direktori Mavlaviy Abdulhodi Hamadan ma’lum qilishicha, shariat doirasida ayollar ishlash huquqiga ega va aeroportda ishlagan avvalgi xodimalarning barchasi o‘z lavozimlariga qaytgan.

Hamadanning eslatishicha, “Tolibon” davlat muassasalarida faoliyat yuritgan ayollarning barchasini ishga qaytishga chaqirgan.

“Biz aeroport xodimalarini ham ishga qaytardik. Barcha xodimlarimiz avvalgi rejimda ishlamoqda”, — dedi u.

Anonim qolishni istagan aeroport xodimalaridan biri ishga qaytishdan mamnun ekanini aytib, “Tolibon” maoshlar masalasini hal qilishini istashini bildirdi.

“Tolibon” yetakchilari hukumat tarkibi tufayli janjallashib qoldi

Afg‘onistonni o‘z nazoratiga olgan “Tolibon” rahbarlari orasida jiddiy ziddiyat yuzaga keldi, deb yozadi Daily Mail.

“Tolibon” harakatining yuqori mansabli vakillari ma’lum qilishicha, prezident saroyidagi majlis chog‘ida harakat asoschilaridan biri bosh vazir o‘rinbosari Abdulg‘ani Birodar qochqinlar ishi bo‘yicha vazir hamda toliblar bilan yaqin aloqada bo‘lgan “Haqqoniy tarmog‘i”ning atoqli vakili Xalil Rahmon Haqqoniy bilan janjallashib qolgan. Hatto ularning tarafdorlari o‘zaro mushtlashib ketgan.

Bahsga Birodarning Afg‘oniston yangi hukumatining tuzilmasidan noroziligi sabab bo‘lgan. Shuningdek, toliblarning Afg‘onistondagi g‘alabasi kimning sharofati bilan bo‘lgani yuzasidan ham kelishmovchilik kelib chiqqan.

Birodarning fikricha, o‘zi kabi odamlar tomonidan olib borilgan diplomatiyaga urg‘u berilishi kerak. “Haqqoniy tarmog‘i” guruhi a’zolari esa g‘alabaga jangovar harakatlar tufayli erishildi, degan fikrda.

Ta’kidlanishicha, aynan Birodar AQSh prezidenti bilan bevosita muzokaralar olib borgan toliblarning tarixdagi birinchi yuqori lavozimli vakili bo‘lgan: 2020-yilda u telefon orqali Donald Tramp bilan gaplashgan. Bungacha u Dohada bitimni imzolab, unga muvofiq Afg‘onistondan Amerika qo‘shinlari olib ketilgan edi.

“Haqqoniy tarmog‘i”ni esa so‘nggi yillarda Afg‘oniston Qurolli kuchlari va ularning g‘arblik ittifoqdoshlariga qarshi olib borilgan eng qirg‘inbarot hujumlar bilan bog‘lashadi. AQSh hukumati uni terrorchilik tashkiloti deb hisoblaydi. “Haqqoniy tarmog‘i” yetakchisi Sirojiddin Haqqoniy Afg‘onistonning yangi hukumatida ichki ishlar vaziri etib tayinlangan.

Toliblar o‘rtasidagi kelishmovchiliklar haqida o‘tgan hafta Birodar omma oldiga chiqmay qo‘yganidan keyin mish-mishlar paydo bo‘lgandi. Hatto ijtimoiy tarmoqlarda uning vafoti haqida taxminlar ilgari surilgan.

Ammo toliblar orasidagi manbalar aytishicha, ziddiyatdan keyin Birodar Kobulni tark etib, Qandahorga jo‘nab ketgan.

Yangi afg‘on hukumati mamlakatda kuchli armiya tuzmoqchi

Afg‘onistonda hokimiyat tepasiga kelgan “Tolibon” harakati mamlakatda muntazam armiya tuzishni rejalashtirmoqda.

“Yaqin kelajakda biz kuchli va tartibli armiya tuzamiz”, — dedi toliblar kuchlari shtab boshlig‘i Qori Fosihuddin 15-sentabr kuni. Uning so‘zlariga ko‘ra, “ayni paytda armiya yaratish haqida maslahatlashuvlar olib borilmoqda”.

Avvalroq AQSh davlat kotibi Entoni Blinken o‘tgan 20 yil ichida bu mamlakatda samarali milliy qurolli kuchlarni yaratishga muvaffaq bo‘linmaganini aytgandi.

Qandahorda minglab afg‘onistonliklar toliblarga qarshi namoyishga chiqdi

Afg‘onistonning Qandahor shahrida minglab aholi “Tolibon”ning buyrug‘iga qarshi chiqdi, deb yozadi Reuters.

3000 ga yaqin oiladan armiya garnizoni yaqinidagi hududni tark etish so‘ralganidan keyin namoyishchilar Qandahordagi gubernator uyi yoniga yig‘ilgan.

Ta’kidlanishicha, garnizon hududiga ko‘plab afg‘onlar xususiy uylar qurib olgan. Uy-joylar davlat yerida barpo qilingan va u yerda asosan iste’fodagi armiya generallari va Afg‘oniston xavfsizlik kuchlarining boshqa harbiy xizmatchilari oilalari yashaydi.

Shu sababli minglab afg‘onlar majburiy ko‘chirib yuborilishga qarshi bosh ko‘tarib, Qandahor ko‘chalariga chiqdi. Odamlar moliyaviy qiyinchiliklardan shikoyat qilib, hatto yegulik sotib olishga puli yo‘qligini aytmoqda.

Sobiq hukumat amaldori Reuters’ga ma’lum qilishicha, odamlarga bu hududni tark etish uchun uch kun muddat berilgan, shu bilan birga, o‘zlari bilan shaxsiy buyumlarni olishga ruxsat etilmagan. “Tolibon” bu hududga o‘z bo‘linmalarini joylashtirishni rejalashtirmoqda.

AQSh sobiq prezidentlari afg‘onistonlik qochqinlarga yordam berish uchun birlashdi

AQShning uch nafar sobiq prezidenti — respublikachi kichik Jorj Bush hamda demokratlar Bill Klinton va Barak Obama afg‘onistonlik qochqinlarga yordam berish vazifasini o‘z oldiga qo‘ygan yangi tashkilotga qo‘shildi, deb yozadi Reuters.

Amerika sobiq yetakchilari va ularning rafiqalari AQSh qo‘shinlari olib ketilganidan keyin Amerikaga evakuatsiya qilingan afg‘onistonlik qochqinlarga yordam berish maqsadidagi Welcome.US notijorat tashkilotlar va biznes-tuzilmalar koalitsiyasi tarkibida ishlaydi.