MSK O‘zbekiston prezidentligiga barcha nomzodlarni ro‘yxatga oldi

Markaziy saylov komissiyasi qaroriga muvofiq, 2021-yilning 24-oktabrida bo‘lib o‘tadigan prezidentlik saylovlarida ishtirok etadigan nomzodlar ro‘yxatga olindi.

• “Milliy tiklanish” demokratik partiyasidan Alisher Qodirov;
• Ekologik partiyasidan Narzullo Oblomurodov;
• Xalq demokratik partiyasidan Maqsuda Vorisova;
• “Adolat” sotsial-demokratik partiyasidan Bahrom Abduhalimov;
• Tadbirkorlar va ishbilarmonlar harakati — O‘zbekiston Liberal demokratik partiyasidan Shavkat Mirziyoyev.

Xalq demokratik partiyasi nomzodi Maqsuda Vorisova uchun 225 mingdan ortiq saylovchining imzosi to‘plangan bo‘lsa, “Adolat” nomzodi Bahrom Abduhalimov uchun 213 mingdan ortiq imzo to‘plangan. O‘zLiDeP nomzodi Shavkat Mirziyoyevni qo‘llab-quvvatlovchi jami 300 mingdan ortiq saylovchining imzosi to‘plangan.

“Gazeta.uz”ning yozishicha, yig‘ilishda mutaxassislar har bir imzo varaqasini vizual o‘rganish jarayonida ularning to‘g‘ri to‘ldirilgani, tuzatishlar kiritilgani, o‘chirib yozilgan tuzatishlar borligi, turli shaxslar tomonidan to‘ldirilgani, o‘xshash imzolar va tasdiqlangan tuzatishlar mavjudligiga e’tibor qaratishgani ta’kidlandi.

Ekspert guruhining xulosasiga asosan taqdim etilgan imzo varaqalari nomzodlarni ro‘yxatga olish uchun yetarli miqdorda to‘plangan va qonun talablariga mos keladi deb qayd etildi.