“Barselona”da 10-raqamning yangi egasi paydo bo‘ldi. Afsonaviy raqam Kataloniya jamoasining iste’dodli futbolchilaridan biri — Ansu Fatiga nasib etdi. La Liga qoidalariga ko‘ra, ushbu raqam bo‘sh qolmasligi kerak, shuning uchun rahbariyat Messining raqamini kimgadir berishi lozim edi.

Foto: “Barselona” FK

10-raqamga boshqa nomzod bor edi. Ikki hafta avval Mundo Deportivo Filippe Koutinyo bu raqamga ega chiqishi mumkinligi haqida yozgandi. Braziliyalik futbolchi ortiqcha bosim bo‘lishini o‘ylab, raqamdan voz kechdi. Keyinchalik Serxio Aguero Messining hurmati tufayli bu raqamni olishdan bosh tortgani haqida aytdi.

Ansu yaqindagina jiddiy jarohatdan tuzalganiga qaramasdan tarixiy raqamni olishdan cho‘chimadi.

  • Fati 2020-yil noyabr oyida “Betis”ga qarshi o‘yinda jarohat oldi va maydonni tark etdi. Futbolchining jarohati jiddiy bo‘lib chiqdi, 2021-yil mart oyida maydonga qaytishi mumkinligi aytildi.
  • Mart oyida Ansuning tiklanishi sekin kechayotgani, “Barselona” esa uni maydonga tushirib tavakkal qila olmasligi xabar qilindi.
  • Ispaniyalik futbolchi yana bir operatsiyani boshidan o‘tkazdi. Portugaliya terma jamoasining shifokori Joze Karlos Noronya ishga kirishdi. U tizzadagi jarohatlar bo‘yicha dunyodagi eng yaxshi mutaxassislardan biri, Krishtianu Ronaldu ham uning xizmatidan foydalanadi. Fati Yevro—2020 da ishtirok eta olmadi.
  • Iyul oyida Ansu tuzala boshladi — shifokorlar unga jamoadoshlari bilan mashg‘ulot o‘tashga ruxsat berdi. Oradan bir oy o‘tib, yosh futbolchi to‘p bilan muomala qila boshladi.
  • Diario Sport nashrining xabariga ko‘ra, Fati La Liga 5-turi doirasida 19-sentabr kuni kechadigan “Granada”ga qarshi o‘yinda maydonga tushishi mumkin.

Foto: Getty Images

Ansu Fati “Barselona”dagi faoliyatini qanday boshlagan?

  • 2019-yil avgust oyi — Ansu ilk bor “Barselona” safida maydonga tushdi. “Betis”ga qarshi o‘yinda debyut qilgan yosh ispan tarixiy rekord qayd etdi. Oxirgi 78 yilda “Barselona”da debyut qilgan eng yosh futbolchiga aylandi. “Kanterano” vakili 16 yosh-u 298 kunlik edi.
  • Lionel Messi Fatini qo‘llab-quvvatladi:

Birinchi kun u bilan shug‘ullanganimda hayratda qolgandim. Biz bilan birga mashg‘ulotlar o‘tadi, uning ajoyib xislatlari bor. Biz u bilan bo‘lishimiz, ortiqcha bosim his qilmasligini ta‘minlashimiz lozim. Atrofidagi shovqin uning rivojlanishiga xalaqit bermasligi uchun yordam berishimiz kerak. Buyuk futbolchi bo‘lishi uchun unda barcha narsa mujassam.

Lionel Messi

  • 2019/20-yilgi mavsumda Fati La Ligada ming daqiqadan ko‘proq maydonga tushdi va 7 ta gol urdi. 17 yoshida esa Ispaniya terma jamoasidan chaqiruv oldi.
  • 2020/21-yilgi mavsum Ansumane uchun yanada yaxshiroq boshlandi: 10 o‘yinda 5+4 ochko. Ammo jarohat barcha rejalarni barbod qildi. Fati mavsumning qolgan qismini o‘tkazib yubordi.

Foto: Getty Images

Endi esa og‘ir jarohat uning faoliyatiga jiddiy ta’sir o‘tkazmasligiga umid qilish kerak. Ko‘pchilik uni Leo Messining izdoshi sifatida ko‘radi. 10-raqam ham bekorga berilmadi.