Belarus Rossiyadan qiymati bir milliard dollardan ko‘proq bo‘lgan qurol-yarog‘ sotib olishni rejalashtirmoqda. Bu haqda mamlakat rahbari Aleksandr Lukashenko ma’lum qildi.
“Bular o‘nga yaqin samolyot, ularning bir qismi allaqachon yetib kelgan, o‘nlab vertolyotlar, Tor-M2 (zenit-raketa kompleksi)dan iborat bo‘ladi”, — ta’kidladi Lukashenko.
Shuningdek, u Moskvada Rossiya prezidenti Vladimir Putin bilan muzokaralarda S-400 yetkazib berish masalasini muhokama qilganini aytdi.
“Biz muzokaralar olib boryapmiz va S-400 yetkazib berishni rejalashtiryapmiz. Vladimir Putin bilan mudofaa va xavfsizlik masalalariga katta e’tibor qaratdik ”,— dedi Lukashenko “G‘arb —2021” harbiy mashg‘ulotlarida.
1-sentabr kuni ham Lukashenko Rossiya tez orada Belarusga o‘nlab samolyotlar, vertolyotlar, havo hujumidan mudofaa tizimlarini va, ehtimol, S-400 zenit-raketa kompleksini ham yetkazib berishini aytgandi. 12-sentabr kuni esa u Rossiya 2025-yilgacha “katta miqdorda” qurol yetkazib berishini ma’lum qildi.
9-sentabr kuni Vladimir Putin va Aleksandr Lukashenko Moskvada muzokaralar olib bordi hamda Rossiya va Belarusni birlashtirishga qaratilgan 28 ta hamkorlik dasturini kelishib oldi. Ittifoq dasturlari haqida tafsilotlar oshkor qilinmagan.
Belarus — Rossiyadan eng katta qarz olgan davlat. Jahon banki ma’lumotlariga ko‘ra, 2019-yil oxirida Belarusning Rossiyadan qarzi 8,1 milliard dollarni tashkil qilgan. 2020-yil dekabr oyida Rossiya Belarusga yana 1 milliard dollarlik kredit ajratgan.
Izoh (0)