Uzbekistan Airports mamlakat aeroportlari uchun kadrlar tayyorlash kafedrasini tashkil etadi

Uzbekistan Airports 3-sentabr kuni Toshkent davlat transport universiteti bilan hamkorlik memorandumini imzolagani haqida xabar berdi.

Memorandumga Uzbekistan Airports boshqaruv raisi Ra’no Jo‘rayeva va Toshkent davlat transport universiteti rektori Odil Abdurahmonov imzo chekkan. Unga ko‘ra Uzbekistan Airports bazasida universitet kafedrasi tashkil qilinadi.

Tomonlar yangi texnik ishlanmalar va axborot texnologiyalarini amaliyotga joriy qilish bo‘yicha qo‘shma loyihalarni amalga oshirishga kelishgan.

Biz Uzbekistan Airports bazasida universitet kafedrasini tashkil qilmoqchimiz. Kafedraga O‘zbekiston aeroportlari uchun kadrlar tayyorlaydigan o‘qituvchilar sifatida yetakchi mutaxassislar, operatsion menejerlar va xorijlik trening-menejerlarni jalb qilishni rejalashtirdik. Ular amaliy mashg‘ulotlar o‘tkazib, talabalarni aerodrom komplekslarida yo‘lovchilar va yuklarga xendling (aviareyslarga yerda xizmat ko‘rsatish) xizmatlarini bajarishda aniq bir vazifalarni bajarishga tayyorlaydi.

Ra’no Jo‘rayeva, Uzbekistan Airports boshqaruv raisi