Tojikiston Respublikasi prezidenti Emomali Rahmon bugun, 7-sentabr kuni Tojikiston davlat mustaqilligining 30 yilligi munosabati bilan Dushanbeda o‘tkazilgan harbiy paradda Tojikiston armiyasi askarlari, ofitserlari va zaxiradagi askarlarni siyosiy hushyorlikni yo‘qotmaslikka chaqirdi.
Davlat rahbari parad ishtirokchilarini Tojikistonning asosiy bayrami bilan tabriklab, mamlakat aholisi respublikada konstitutsiyaviy tuzumni tiklash, tojik zaminida tinchlik va totuvlikni ta’minlash uchun jonini fido qilgan o‘g‘il-qizlarini hech qachon unutmasligini ta’kidladi.
“Bugun minglab fuqarolarimiz vatanga halol va vijdonan xizmat qilayotganidan faxrlanamiz va ular bundan keyin ham ushbu vazifani sharaf bilan ado etishiga ishonamiz”, — dedi prezident.
Emomali Rahmonning qayd etishicha, Tojikiston xalqi va hukumati milliy armiya askarlari va ofitserlari timsolida tinchlik, barqarorlik, birlik va milliy manfaatlar himoyachilarini ko‘radi.
U so‘nggi paytlarda terrorchilar, ekstremistlar, radikallar, narkoguruhlar, noqonuniy qurol-yarog‘ savdosi, kiberjinoyatlar tufayli yuzaga kelayotgan yangi muammolar mintaqadagi va butun dunyodagi vaziyatni yomonlashtirganini ta’kidladi.
Bu borada davlat rahbari Tojikiston Qurolli kuchlari va huquq-tartibot organlari vakillarini siyosiy hushyorlikni yo‘qotmaslikka, o‘z malaka va bilimlarini doimiy oshirib borishga chaqirdi.
Dushanbe garnizoni bo‘linmalari va qo‘shinlarining harbiy paradida 15 mingdan ortiq tojik askar va ofitserlari hamda 30 ming zaxiradagi askarlar qatnashdi.
9-sentabr, Tojikiston Mustaqilligi kunida Dushanbedagi “Do‘sti” maydonida fuqarolarning bayram yurishi bo‘lib o‘tadi, unda poytaxtning 45 mingdan ortiq aholisi ishtirok etadi.
Avvalroq Tojikiston prezidenti “Tolibon”ga qarshi kuchlarning marhum yetakchilarini mukofotlagandi. Xususan, Emomali Rahmon Afg‘oniston sobiq prezidenti Burxoniddin Rabboniyni va hayotligi chog‘ida “Tolibon”ga qarshi kurashgan dala qo‘mondoni Ahmadshoh Mas’udni I darajali Ismoil Somoniy ordeni bilan mukofotladi.
Izoh (0)