O‘zbekistonda 2023-yilgacha jamoat transportining kamida 50 foizi gaz-ballon yonilg‘i, elektr va boshqa muqobil yoqilg‘i turlariga o‘tkaziladi. Bu haqda AOKAda o‘tkazilgan brifingda Ekologiya va atrof-muhitni muhofaza qilish davlat qo‘mitasi boshqarma boshlig‘i Azizjon Kalimbetov ma’lum qildi.
Foto: “Daryo” / Madina Nurman
Kalimbetovning so‘zlariga ko‘ra, 2023-yilgacha bo‘lgan Atrof-muhitni muhofaza qilish konsepsiyasi doirasida jamoat transportining kamida 50 foizini gaz-ballon yonilg‘i, elektr va boshqa muqobil yonilg‘i turlariga o‘tkazish belgilangan.
“2021-yilning o‘tgan davrida respublikada foydalanishdagi 3 milliondan ortiq avtotransport vositasining 60 foizi gaz yonilg‘isida harakatlanishga mo‘ljallangan. Transport vositalaridan atmosferaga tashlamalarni kamaytirish va me’yor darajasida ekanini aniqlash maqsadida bahor mavsumida ‘Toza havo’ tadbirining birinchi bosqichi o‘tkazildi.
Tadbir davomida 120 mingdan ortiq transport vositasi ko‘rikdan o‘tkazilib, ularning qariyb 5 mingtasi belgilangan me’yorlardan ortiq ekani aniqlandi va ularning 1,5 mingga yaqini vaqtincha to‘xtatilishi evaziga atmosferaga kuniga o‘rtacha 80 tonna zararli moddalar tashlanishining oldi olindi. Hozirda tadbirning 2-bosqichi — 10-avgustdan 10-sentabrgacha bo‘lib o‘tmoqda”, — deydi qo‘mita vakili.
