Jizzax viloyatining Zomin tumani “Duoba” qishloq fuqarolar yig‘ini O‘riklisoy qishlog‘i yaqinidagi o‘rmon hududlarida 1-avgust kuni yirik yong‘in yuz bergandi. Bosh prokuratura axborot xizmati rahbari Hayot Shamsutdinovning “Daryo” so‘roviga asosan ma’lum qilishicha, holat yuzasidan shu kuni jinoyat ishi qo‘zg‘atilgan.
Dastlabki to‘plangan hujjatlarga ko‘ra, O‘riklisoy qishlog‘ida joylashgan dam olish maskani birining atrofida yong‘in xavfsizligi qoidalariga rioya qilinmasdan qurilish-montaj ishlari olib borilayotganda yong‘in kelib chiqib, archa va boshqa o‘simliklar yonib nobud bo‘lib, Zomin Milliy tabiat bog‘iga juda ko‘p miqdorda zarar yetishiga sabab bo‘lgan.
Mazkur holat yuzasidan 1-avgust kuni Jizzax viloyati prokuraturasi tomonidan Jinoyat kodeksining 198 (ekinzorlarni, o‘rmonlarni, daraxtlarni yoki boshqa o‘simliklarni shikastlantirish yoxud nobud qilish) va 259-moddalari (yong‘in xavfsizligi qoidalarini buzish) bilan jinoyat ishi qo‘zg‘atilgan.
“Hozirda Bosh prokuratura tomonidan jinoyat ishi bo‘yicha tergov harakatlari olib borilmoqda. Tergovga aralashish va to‘sqinlik qilish holatlarining oldini olish maqsadida boshqa tafsilotlar oshkor qilinmaydi”, — deyiladi Bosh prokuratura taqdim etgan ma’lumotda.
Eslatib o‘tamiz, 1-avgust kuni soat, taxminan, 10:40 da boshlangan yong‘in salkam sakkiz soatdan so‘ng o‘chirilgan. FVV ma’lumotlariga ko‘ra, 80 gektar maydonda quruq o‘t va daraxtlar yongan. Olovni o‘chirishga 1600 ga yaqin odam jalb etilgan.
Jumladan, FVV dastlab olovni o‘chirish uchun 4 ta yong‘in-qutqaruv bo‘linmasi va favqulodda vaziyatlar boshqarmasi shaxsiy tarkibining 24 nafar vakili yo‘naltirilgani haqida xabar bergan edi. Keyinroq yong‘inning tarqalishining oldini olish va uni o‘chirish uchun FVV shaxsiy tarkibining yana 350 dan ortiq vakili yuborilgani, shuningdek, Milliy gvardiya, IIV, Ekologiya qo‘mitasi va boshqa tashkilotlarning kuch va vositalari jalb etilgani ma’lum qilindi.
Shu bilan birga, Mudofaa vazirligi matbuot xizmati yong‘in signali olinishi bilan 400 nafar harbiy xizmatchidan iborat batalyon favqulodda holat hududiga borib, olovni o‘chirishga kirishganini ma’lum qildi. Harbiy-havo kuchlarining to‘rtta vertolyoti esa Zomin suv omboridan 20 martadan ortiq suv olib, alanga o‘choqlariga 30 tonnadan ortiq suv tashlagan.
Ijtimoiy tarmoqlarda “Duoba” tarafdagi o‘rmonlar 2-avgust kuni ham tutayotgani haqida videoxabarlar tarqaldi, biroq FVV matbuot xizmati hududda yong‘in bo‘layotgani haqidagi gumonlarni rad etdi. 8-avgust kuni Zomin tog‘larida yana yong‘in sodir bo‘ldi. FVV matbuot xizmati vaziyat to‘liq nazorat ostidaligi, tez orada qo‘shimcha ma’lumotlar taqdim etilishini bildirdi. Biroq ushbu yong‘in yuzasidan qo‘shimcha ma’lumot taqdim etilmadi.
Jizzax viloyati FVB axborot xizmati rahbari Farrux Abdurahmonov “Yangi davr”ga bergan intervyusida “yong‘in asosan inson omili bilan bog‘liq holda yuz bergan bo‘lishi mumkin”ligini ma’lum qilgandi. Chunki mas’ulning izohlashicha, yong‘in boshlanishi arafasida o‘rmonda havo ochiq, harorat Selsiy bo‘yicha 26—28 daraja iliq bo‘lgan, shuningdek, hududdan o‘tgan elektr uzatish liniyalarida ham uzilishlar qayd etilmagan.
Shavkat Mirziyoyev 24-avgust kuni o‘tkazilgan yig‘ilishda Zomin tog‘larida yuz bergan yong‘in haqida “bir noinsof boyvachchaning o‘g‘li shu ishni qilibdi”, deb aytgandi. “Hozir prokuratura shug‘ullanyapti, albatta, chora ko‘ramiz”, — deb ta’kidlagandi Prezident.
Izoh (0)