AOKAda o‘tkazilgan brifingda Koronavirusga qarshi kurashish shtabi a’zosi Sevara Ubaydullayeva mamlakatda koronavirus to‘lqini ortda qoldi deb xulosa chiqarishga hali vaqt borligini ta’kidladi.
“Darhaqiqat, 1-sentabrdan hozirgi kunga qadar rasmiy statistik ma’lumotlarga ko‘ra yangi kasallanganlar soni 650 va undan pastroq bo‘lmoqda. Lekin bu raqam hali yuqori, kasallik to‘lqini ortda qoldi, deb xulosa chiqarish uchun hali vaqt bor.
Kasallikning yashirin davri 2 kundan 14 kungacha, ya’ni inson organizmiga tushgan virus 2 kundan keyin yoki 10 uzog‘i 14 kungacha ham kasallik alomatini keltirib chiqarishi mumkin, kasallikni keltirib chiqarish muddatini o‘rtacha olganda 5-7 kunga to‘g‘ri kelmoqda. Yana 10-14 kunda yangi kasallanish aniqlanishi o‘sishi yoki tushishining dinamik kuzatuvini olib borib, keyin bir xulosaga kelsak bo‘ladi.
Aholi orasida to‘liq emlangan va bu kasallikdan himoyalanganlarni ham nazarda tutadigan bo‘lsak, bugungi kunda kasallanmagan va emlanmaganlar orasida kasallik tarqalishi ehtimoli juda yuqori. Karantin qoidalariga rioya qilmaydigan, emlanmagan odamlar hisobiga raqamlar yana ko‘tarilishi ham mumkin”, — deydi Ubaydullayeva.
Ta’kidlash kerakki, so‘nggi to‘rt kundan buyon kunlik kasallanish holati 700 dan past ko‘rsatkichni qayd etmoqda — 5-sentabr kuni 640 kishida COVID-19 tasdiqlangandi.
Eslatib o‘tamiz, avgust o‘rtalarida Koronavirusga qarshi kurash shtabi a’zosi Nurmat Otabekov O‘zbekistonda koronavirus bo‘yicha vaziyat yaxshilanayotganini ma’lum qilgandi.
Izoh (0)