Toshkentning Chilonzor tumanida @inkuzart taxallusi bilan ijod qilayotgan ko‘cha rassomi Abdurahmon 4-sentabr kuni UzAuto Motors kompaniyasining monopoliyasiga atab strit-art chizgan edi. 5-sentabr kuni u ushbu ijod namunasi o‘chirilayotganini e’lon qildi. Voqea joyida bo‘lgan “Daryo” muxbiri o‘chirish harakati muvaffaqiyatsiz tugaganiga guvoh bo‘ldi.
“Daryo” muxbirining qayd etishicha, kimdir devoriy suratning ustidan oq bo‘yoq tortib, o‘chir(tir)ib tashlamoqchi bo‘lgan. Ammo buning uddasidan chiqmagan. Suratdan ham ko‘rish mumkinki, o‘chirish uchun buning o‘zi yetarli bo‘lmagan. Strit-artda va yerda ohak izlari qolgan.
Avtomonopoliyaga qarshi surat hamon AQShning Chilonzordagi eski elchixonasi devorlarida turibdi va uning fonida hali ham suratga tushish mumkin.
Unda O‘zbekistondagi avtosalonlarda mashina xarid qilish uchun yuzaga kelayotgan uzundan uzoq navbat tasvirlangan. Navbat boshida turgan insonning qizil bosh kiyimi “shapka” tizimiga ishora qiladi.