Toshkentda bolalarga noqonuniy diniy ta’lim bergan 42 yoshli erkak jarimaga tortildi

Toshkent shahri Chilonzor tumanida bolalarga noqonuniy diniy ta’lim bergan erkak jarimaga tortildi, deya xabar bermoqda shahar Ichki ishlar bosh boshqarmasi axborot xizmati.

Ma’lum qilinishicha, profilaktik tadbir davomida A.V. o‘z uyida 3 oy davomida tegishli ruxsatsiz bolalar uchun diniy adabiyotdan foydalangan holda dars o‘tgan. Erkakning muqaddam sudlangani aniqlangan.

Qayd etilishicha, holat yuzasidan Ma’muriy javobgarlik to‘g‘risidagi kodeksning 241-moddasi (diniy ta’limotdan saboq berish tartibini buzish) bo‘yicha hujjatlar rasmiylashtirilib, sudga yo‘naltirilgan.

Sud fuqaroga nisbatan bazaviy hisoblash miqdorining 5 baravari miqdorida jarima tayinlagan.

Bundan avval Toshkentda voyaga yetmaganlarga noqonuniy diniy ta’lim bergan yigit 15 sutkaga qamalgani, Qashqadaryoda 13 nafar voyaga yetmagan bolaga noqonuniy diniy ta’lim berish bilan shug‘ullangan ona-bola aniqlangani hamda Toshkent viloyatida 25 nafar bolaga noqonuniy diniy saboq berib, ularni kaltaklagan aka-ukalar ushlangani haqida xabar berilgandi.