Vazirlar Mahkamasining “O‘zbekiston Respublikasi hukumatining ayrim qarorlariga chet davlat fuqarolari va fuqaroligi bo‘lmagan shaxslarning O‘zbekiston Respublikasida bo‘lish tartibini takomillashtirishga qaratilgan o‘zgartirishlar kiritish to‘g‘rida”gi qarori qabul qilindi.
Hujjat bilan Vazirlar Mahkamasining 1996-yil 21-noyabrdagi 408-son qaroriga o‘zgartirish kiritilgan. Xususan, ushbu qarorda karantin joriy etilgan hududda vaqtincha bo‘lish muddati tugagan xorijiy fuqarolarga, shuningdek, ularni qabul qilgan uy-joy egalari hamda mansabdor shaxslarga nisbatan karantin muddati tugagunga qadar O‘zbekistonda bo‘lish qoidalarini buzganligi uchun ma’muriy choralar qo‘llanilmasligi belgilangandi.
Hukumatning yangi qaroriga asosan mazkur band bekor qilinib, chet el fuqarolari va fuqaroligi bo‘lmagan shaxslar 10-sentabrdan respublikada bo‘lish tartibini buzgani uchun O‘zbekiston hududidan chiqarib yuboriladi.
Hujjatga muvofiq, respublika hududidagi chet el fuqarolari va fuqaroligi bo‘lmagan shaxslar 2021-yil 10-sentabrgacha vaqtinchalik ro‘yxatdan o‘tishlari kerak bo‘ladi.
Qarorning bajarilishi ichki ishlar vaziri Po‘lat Bobojonov zimmasiga yuklatilgan.
Avvalroq Rossiyada 30-sentabrgacha maqomini qonuniylashtirmagan migrantlar mamlakatdan chiqarib yuborilishi ma’lum qilingandi.
Izoh (0)