Belgiyaning Eccholine BV xalqaro prodyuserlik kompaniyasi tomonidan Fransiyaning M-6 telekompaniyasi uchun suratga olinayotgan “Pekin ekspressi” (Peking Express) sarguzasht realiti-shousi ishtirokchilari Namanganga keldi. Bu haqda “Daryo” muxbiri Azizbek Abduvaliyev xabar bermoqda.
Ushbu realiti-shou qatnashchilari bir necha guruhlarga bo‘linadi. Har bir guruhda ikki kishi bo‘lib, ular O‘zbekiston bo‘ylab sayohatga jo‘naydi. Tasvirga olish ishlari 2021-yil 3-sentabr kuni Namangan shahrida boshlanib, 15-sentabrda Qoraqalpog‘istonda yakunlanadi.
“Realiti-shou sujeti shundan iboratki, har bir guruh kuniga atigi 1 yevro mablag‘ bilan sayohatga otlanadi. Budjetning o‘ta cheklangani qatnashchilarni mahalliy aholining ko‘magi va mehmondo‘stligiga tayanishga undaydi. Bu esa, o‘z navbatida, ko‘zda tutilmagan voqea-hodisalar sabab bo‘ladi, tomoshabinlarga esa mahalliy urf-odat va an’analar bilan yaqindan tanishish imkoniyatini yaratadi”, — deydi Namangan viloyat turizm va sport bosh boshqarmasi boshlig‘ining o‘rinbosari Ayubxon Bobomirzayev.
Bobomirzayevning aytishicha, Namanganga “Pekin ekspressi” realiti-shousi tasvirga olish guruhi va ishtirokchilaridan iborat jami 87 kishi kelgan. Ular orasida Fransiya, Belgiya, Niderlandiya, Kanada, Kosta-Rika, Daniya, Marokash kabi 15 dan ortiq davlat vakillari bor.
Ma’lumot uchun, mazkur teleshou Yevroittifoq va Janubiy Amerika telekanallari orqali namoyish etiladi. Uning har bir epizodini o‘rtacha 3 milliondan ortiq tomoshabin kuzatib boradi.
Izoh (0)