AQSh shimoli-sharqida “Ida” dovuli tufayli yuzaga kelgan tornado va suv toshqini oqibatida 42 kishi halok bo‘ldi. Bu haqda NBC News xabar berdi.
Xususan, Nyu-Jersida 23 kishi, Nyu-Yorkda sakkiz kishi, jumladan, ikki yoshli bola vafot etgan. Shuningdek, Bridjuoter shahrida, Hillsboro, Montgomeri, Janubiy Pleynfild va Passaik grafliklarida ham qurbonlarning jasadi topilgan.
Hukumat Nyu-York (shahar va shtat), Nyu-Jersi va Passaikda favqulodda holat e’lon qildi. NBC News telekanalining AQSh Milliy ob-havo xizmatiga tayanib xabar berishicha, Nyu-York shahar markaziy bog‘ida kunlik yog‘ingarchilik 1-sentabr, chorshanba kuni 7,13 dyuym (18,11 sm)ni tashkil etib, 1927-yilda o‘rnatilgan rekordni yangiladi — o‘shanda yog‘ingarchilik 3,84 dyuym (9,75 sm) bo‘lgan.
AQSh prezidenti Jo Bayden energetika vaziri Jennifer Grenxolmga “Ida” dovuli tufayli mamlakatda yoqilg‘i narxining oshishiga yo‘l qo‘ymaslik uchun strategik neft zaxirasidan foydalanishni buyurdi.
“Men energetika vaziri Grenxolmga quvurlarda benzin to‘xtab qolmasligi uchun ixtiyoridagi hamma narsadan, shu jumladan, strategik neft zaxirasidan foydalanishini aytdim”, — dedi Bayden. Prezidentning qo‘shimcha qilishicha, strategik zaxiradan foydalanish yoqilg‘iga ega bo‘lish imkoniyatini oshiradi va uning narxi ko‘tarilishiga qarshi kurashadi.
Baydenning aytishicha, uning ma’muriyati “Ida” yetkazgan zararni, shu jumladan, neft faol ravishda qazib olinayotgan hududlardagi oqibatlarni iloji boricha tezroq baholashga tayyor.
29-avgust kuni Meksika ko‘rfazi sohiliga “Ida” dovuli kirib keldi. Dastlab, shamol tezligi soatiga 240 kilometrga yetgan, dovulga xavflilik darajasi bo‘yicha beshta toifaning to‘rtinchisi berilgan. Tabiiy ofat tufayli AQShning Luiziana shtatida 1 milliondan ortiq aholi elektr energiyasidan uzilib qoldi, bir kishi vafot etdi. Keyin dovul Missisipi, Tennessi hududlaridan o‘tib, Virjiniya, Merilend, Pensilvaniya, Nyu-York va Nyu-Jersi shtatlarini qamrab oldi. Bir kun oldin tabiiy ofat qurbonlari soni 20 taga yetgani xabar qilingandi.
Shu bilan birga, hozirda AQSh Atlantikada kuchayib borayotgan yana bir dovul — Larri haqida ogohlantirilmoqda. Meteorologlar uning bir necha kun ichida uchinchi toifaga yoki undan yuqori darajaga ko‘tarilishini prognoz qilmoqda. Larri shamolining tezligi hozirda 128,7 km/soat.
Izoh (0)