AQShning Afg‘onistondagi harbiy missiyasi to‘liq yakunlangan, Panjsher darasidagi “Tolibon”ga qarshilik kuchlarini harbiy jihatdan qo‘llab-quvvatlash haqida gap ham bo‘lishi mumkin emas. Bu haqda Pentagon rasmiy vakili Jon Kirbi ma’lum qildi, deb yozadi “RBK”.
“AQShning Afg‘onistondagi harbiy missiyasi tugadi”, — deya javob qildi Kirbi Panjsher darasida qurolli qarshilik tashkil qilmoqchi bo‘lgan va xalqaro hamjamiyatdan yordam so‘rayotgan “Tolibon”ga qarshi kuchlarga amerikaliklar yordam bera oladimi, degan savolga.
Shu bilan birga, u AQShga nisbatan terrorchilik tahdidlari oldini olish uchun ma’lum nuqtaga qaratilgan operatsiyalar amalga oshirilishi mumkinligini istisno qilmadi. “Ammo bu boshqa narsa, Afg‘onistonda uzoq muddatli harbiy missiya olib borish — boshqa narsa”, — deya aniqlik kiritdi u.
Oq uy matbuot kotibi Jen Psakiga ham brifing chog‘ida Vashington qarshilik kuchlari bilan aloqada bo‘lib turgan-turmagani va ularga ko‘mak berish-bermasligi haqida shunga o‘xshash savol berishgandi. “Ular bilan hamkorligimiz haqida sizga ma’lum qilish mumkin bo‘lgan hech narsa yo‘q”, — degan edi u o‘shanda.
AQSh va ittifoqdoshlari o‘z qo‘shinlarini olib ketishni boshlaganidan keyin “Tolibon” hujumga o‘tishni boshlagandi. Ular yirik shaharlarni birin-ketin egallab, 15-avgust kuni Kobulga yetib keldi. Panjsher hozirgacha “Tolibon” nazorati ostiga o‘tmagan yagona viloyat bo‘lib qolmoqda. U yerda o‘zini davlat rahbari deb e’lon qilgan vitse-prezident Amrulla Solih ham joylashib olgan.
22-avgust kuni “Tolibon” panjsherliklarga ultimatum e’lon qilib, to‘rt soat ichida taslim bo‘lishni talab qildi. Mas’ud Panjsher yetakchilari viloyatni topshirib qo‘ymasligini bildirdi. Keyinroq “Tolibon” hududga yuzlab jangchilarni yuborganini ma’lum qilib, viloyatni qamal qilishni boshladi. “Tolibon” Panjsher aholisini internetdan uzib qo‘ydi, hududda mobil aloqa ishlashdan to‘xtadi.
Mas’ud voqealar rivoji tinch bo‘lishiga umid bildirdi, ammo “harbiy variant”ni ham istisno qilmadi va qarshilik kuchlari ehtimoliy hujumlarni qaytarishga tayyorlanayotganini qayd etdi.
1-sentabr kuni Afg‘onistonning Bakhtar News Agency axborot agentligi manbalarini oshkor qilmagan holda “Tolibon” Panjsherda operatsiya boshlab, Shutul tumanini egallab olgani haqida xabar berdi. Qarshilik kuchlari vakillari, o‘z navbatida, “Tolibon” vodiyga bostirib kirishga uringani, ammo ularning hujumi muvaffaqiyatli tarzda daf etilganini ma’lum qildi.
Keyinroq Afg‘onistonning “Tolibon”ga bo‘ysunmagan Panjsher viloyatidagi qarshilik kuchlari bilan to‘qnashuvlarda harakatning 300 dan ortiq a’zosi yo‘q qilingani ma’lum bo‘ldi.
Izoh (0)