O‘zbekiston 2021-yilning yetti oyida xorijga qiymati 14,5 milion dollarga teng bo‘lgan 53,6 ming tonna qovun va tarvuz eksport qilgan. Bu haqda Davlat statistika qo‘mitasi xabar berdi.

Ma’lum qilinishicha, 2021-yili mamlakatda yetishtirilgan qovun va tarvuzlar 19 ta xorijiy davlat bozorlariga yetkazib berilgan bo‘lib, 2020-yilning mos davriga nisbatan 42,1 ming tonnaga, ya’ni qariyb 4,6 baravarga oshgan.

O‘tgan 7 oy mobaynida O‘zbekiston eng ko‘p qovun va tarvuz eksport qilgan davlatlar:

  • Qozog‘iston — 24,8 ming tonna;
  • Rossiya — 16,4 ming tonna;
  • Qirg‘iziston — 5,9 ming tonna;
  • Ukraina — 2,8 ming tonna;
  • Belarus — 1,2 ming tonna;
  • Latviya — 1,4 ming tonna;
  • Germaniya — 509,8 tonna;
  • Moldova — 239,0 tonna.

Avvalroq O‘zbekiston bodring eksportini 2,5 million dollarga oshirgani, O‘zbekiston besh oyda 291,6 million dollarlik meva va sabzavotlarni eksport qilgani to‘g‘risida xabar berilgandi.