Buxoro viloyati Kogon tumanida avval ham sudlangan shaxs fuqaro xonadonidan katta miqdorda pul o‘g‘irladi, deya xabar qilmoqda Ichki ishlar vazirligi axborot xizmati.
Qayd etilishicha, Kogon tumani ichki ishlar bo‘limi tomonidan berilgan ma’lumotga ko‘ra, 2021-yilning 23-iyul kuni soat 11:00 dan 12:00 ga qadar bo‘lgan vaqt oralig‘ida noma’lum shaxs Kogon tumani “Tutkunda” mahallasi Sheyxon qishlog‘ida yashovchi, 1969-yilda tug‘ilgan tadbirkor ayol A.N.ning yashash uyiga devor orqali g‘ayriqonuniy ravishda kirib, uning xonadonidan 3000 AQSh dollari miqdoridagi pul mablag‘lari va jami bahosi 36 700 000 so‘mlik tilla taqinchoqlarini yashirin ravishda talon-toroj qilib, jabrlanuvchiga jami 68 495 980 so‘mlik moddiy zarar yetkazib, voqea joyidan yashiringan.
Mazkur holat yuzasidan Kogon tumani ichki ishlar bo‘limi tergov-tezkor guruhi tomonidan hodisa sodir bo‘lgan joy sinchkovlik bilan ko‘zdan kechirilib, kechiktirib bo‘lmas tergovga qadar tekshiruv harakatlari o‘tkazilgan holda noma’lum shaxsga nisbatan Jinoyat kodeksining 169-moddasi 2-qismi (o‘g‘rilik) bilan jinoyat ishi qo‘zg‘atilgan.
O‘g‘rilik sodir etgan shaxs “Tutkunda” mahallasiga xavfsiz mahalla tamoyili asosida o‘rnatilgan kameralardan biriga tushib qolgan.
Jinoyat ishi bo‘yicha olib borilgan surishtiruv hamda dastlabki tergov harakatlari, shuningdek, mahalla hududidagi videokameralar tasvirlari yuzasidan o‘tkazilgan tezkor-texnik tadbirlar davomida ushbu jinoyatni asli Qashqadaryo viloyati Muborak tumanida ro‘yxatda turuvchi, muqaddam to‘rt marotaba o‘g‘rilik jinoyatini sodir qilgan, bugungi kunda Muborak tumani ichki ishlar bo‘limi probatsiya xizmati nazorati ostida turuvchi, Buxoro shahar Mirdo‘stim ko‘chasida vaqtincha yashab kelayotgan 1991-yilda tug‘ilgan, xavfli retsidivist X.A. ismli shaxs sodir qilganligi fosh etildi.
Jinoyatni fosh etish jarayonida u ro‘yxatda turuvchi hamda vaqtinchalik istiqomat qilib kelayotgan yashash manzillarida tintuv-tergov harakatlari o‘tkazilganda, jinoyatga aloqador bir qancha ashyoviy dalillar aniqlanib, tegishli tartibda hujjatlashtirib olingan.
Hozirgi kunda ushbu shaxsning Qashqadaryo hamda Buxoro viloyatining turli hududlarida sodir etgan 4 ta o‘g‘rilik jinoyati fosh etilib, ayblanuvchi X.A.ga nisbatan qamoqqa olish tarzidagi ehtiyot chorasi qo‘llanilgan va uning boshqa shu turdagi fosh etilmasdan qolayotgan jinoyatlarga aloqadorligini aniqlash yuzasidan tezkor surishtiruv hamda tergov harakatlari davom ettirilmoqda.
Mavzuga doir:
Izoh (0)