Toshkent viloyatidan Toshkent shahriga o‘tayotgan hududlarda 95 mingdan ortiq aholi istiqomat qiladi — Senat qo‘mitasi

24-avgust kuni Mudofaa va xavfsizlik masalalari qo‘mitasining O‘zbekiston Qurolli Kuchlari akademiyasida bo‘lib o‘tgan majlisida Toshkent viloyati va Toshkent shahri chegaralarini o‘zgartirish masalasi muhokama qilindi. Bu haqda qo‘mita matbuot xizmati “Daryo”ga ma’lum qildi.

Ma’lum qilinishicha, Toshkent shahri aholisi soni 2021-yil 1-iyul holatiga ko‘ra, 2,737 million kishini tashkil etib, 2021-yil boshiga nisbatan 42,8 ming kishiga yoki 101,6 foizga o‘sgan, aholining zichligi 1 kilometr/kvadratga 7564 kishini tashkil etadi. Bu esa o‘z navbatida kelajakda Toshkent shahrini rivojlantirish, hududini yanada kengaytirish kabi masalalarni yuzaga chiqaradi.

“Toshkent shahri aholisi sonining yil sayin yuqori sur’atlarda o‘sib borishi natijasida shaharda yangi ijtimoiy soha obyektlarini qurish, yangi ishlab chiqarish va xizmat ko‘rsatish korxonalarini tashkil etish, madaniy va dam olish maskanlarini ko‘paytirish masalalarini hal etish choralarini ko‘rish talab etiladi. Bu kabi muammolar Toshkent shahri hududini bosqichma-bosqich kengaytirish orqali amalga oshirilishi mumkin”, — deyiladi xabarda.

Shu bois Oliy Majlis Senati qaroriga ko‘ra, Toshkent viloyatidan 7 853,3 gektar yer maydoni Toshkent shahriga, Toshkent shahridan 171,3 gektar yer maydoni Toshkent viloyati hududiga o‘tkazilishi belgilanmoqda.

Ushbu hududlarda 15 ta (2025 o‘rinli) maktabgacha ta’lim tashkiloti, 16 ta (8756 o‘rinli) umumta’lim maktablari va 6 ta oilaviy poliklinika mavjud. Shu bilan birga, 1421 ta kichik tadbirkorlik subyektlari sanoat, xizmat ko‘rsatish va servis sohalarida faoliyat yuritmoqda.

“Toshkent viloyati hududidan Toshkent shahriga yer maydonlari o‘tkazilishi natijasida aholi turmush sharoiti yanada yaxshilanib, ishlab chiqarish va xizmat ko‘rsatish sohalarini kengaytirishga, xorijiy investitsiyalarni keng jalb etishga, shahar eksport salohiyatini oshirishga, muhandislik-kommunikatsiya va yo‘l infratuzilmasi obyektlarini yanada yaxshilashga xizmat qiladi”, — deya qayd etiladi xabarda.

Eslatib o‘tamiz, 2020-yilning 5-avgust kuni Shavkat Mirziyoyev Toshkent shahri va Toshkent viloyatining o‘zaro chegaradosh bo‘lgan tumanlari hududlarini o‘zgartirish bo‘yicha tayyorlangan loyihalar taqdimoti bilan tanishgandi. O‘shanda aholiga qulaylik yaratish maqsadida shahardan Toshkent viloyatiga 1010 gektar, viloyatdan poytaxtga 10 196 gektar yer maydoni o‘tkazilishi rejalashtirilgan edi. Keyinroq Ulug‘bek shaharchasining aholisi Toshkent viloyati tarkibiga, shuningdek, Uchtepa tumani yashovchilari uchta mahalla Toshkent viloyatining Zangiota tumani tarkibiga o‘tkazishga qarshi chiqqandi.