O‘zbekiston orqali evakuatsiya qilinayotgan afg‘onistonlik homilador ayol Toshkent shahar 4-son klinik shifoxonasining tug‘ruq bo‘limida farzandini dunyoga keltirdi, deb xabar beradi SSV matbuot xizmati.
Foto: SSV matbuot xizmati
Afg‘onistonda hukumat almashish jarayonlari fonida ko‘plab davlatlar o‘z fuqarolarini hamda afg‘onistonliklarni evakuatsiya qilishga kirishgan. O‘zbekiston ushbu jarayonlar uchun o‘z havo yo‘llarini ochish orqali insonlarni Afg‘onistondan xavfsiz ko‘chirishga hissa qo‘shmoqda. Ta’kidlanishicha, Toshkent aeroportiga qo‘ngan insonlarning salomatligi ham nazoratga olingan.
Vazirlikning ma’lum qilishicha, Afg‘onistondan parvozlar amalga oshirilayotgan aeroportning o‘zida tibbiy punkt tashkil etilgan bo‘lib, unga tibbiyot va sanitariya-epidemiologiya xizmati xodimlari hamda Toshkent shahar tez tibbiy yordam stansiyasidan brigada navbatchilari jalb etilgan. Tibbiy yordamga ehtiyoj sezgan insonlarga zarur xizmatlar ko‘rsatilmoqda.
“Kuni kecha 1999-yilda tug‘ilgan afg‘onistonlik fuqaro E.A. ‘Homiladorlik 1. Tug‘ruq 1. 39—40 hafta’ tashxisi bilan tez tibbiy yordam brigadasi orqali Toshkent shahar 4-son klinik shifoxonasining tug‘ruq bo‘limiga yotqizilgan. Kecha oqshom ushbu muassasada 22 yoshli E.A. ilk farzandini dunyoga keltirdi”, — deyiladi xabarda.
Afg‘onistonlik yosh ona 3 kilogramm 840 gramm vazn bilan tug‘ilgan o‘g‘lini o‘zbek shifokorlari yordamida qo‘liga olgan. U ma’lum muddat mutaxassislar nazoratida bo‘lib turadi.
Bundan avval Afg‘onistondan Polsha fuqarolarini evakuatsiya qilayotgan samolyotlar Navoiyga qo‘nayotgani, Shavkat Mirziyoyev Angela Merkel bilan fuqarolarni Afg‘onistondan O‘zbekiston orqali evakuatsiya qilish jarayonini muhokama qilgani hamda Shveysariya ham Afg‘onistondagi fuqarolarini O‘zbekiston hududi orqali evakuatsiya qilishi haqida xabar berilgandi.
