Xalqaro valyuta jamg‘armasi (XVJ) Afg‘onistonga yordam berishni to‘xtatdi. Bunga respublikani egallab olgan “Tolibon” hokimiyatining tan olinish-olinmasligi muammosi sabab bo‘lmoqda.
“XVJ har doimgidek xalqaro hamjamiyatning fikriga asoslanadi. Hozirda xalqaro hamjamiyatda Afg‘onistondagi hukumatni tan olish borasida aniqlik yo‘q, buning natijasida mamlakat maxsus qarz olish huquqlaridan yoki XVJning boshqa resurslaridan foydalana olmaydi”, — deb yozadi jamg‘armaning kommunikatsiyalar departamenti direktori Jerri Rays Twitter’dagi bayonotida.
18-avgust kuni The New York Times AQSh moliya vaziri vakiliga tayanib yozishicha, AQSh prezidenti Jo Bayden ma’muriyati “Tolibon”ning 400 million dollarlik yordamdan foydalanish imkoniyatiga to‘sqinlik qilmoqchi. XVJ kelasi hafta ushbu mablag‘ni Afg‘onistonga o‘tkazishi kerak edi. Nashr manbasining aytishicha, jamg‘arma o‘z a’zolarining “Tolibon”ga bo‘lgan munosabatini aniqlash maqsadida ularning reaksiyasini kuzatib bormoqda.
Shuningdek, AQSh Afg‘onistonning Amerika banklaridagi davlat zaxiralarini muzlatib qo‘ygan. XVJ ma’lumotlariga ko‘ra, 2021-yil aprel oyi holatida Afg‘oniston hukumati zaxiralari 9,4 milliard dollar bo‘lgan, bu mamlakat yillik yalpi ichki mahsulotining uchdan bir qismini tashkil qiladi. Bu mablag‘lar asosan AQShda saqlanadi, Amerika banklaridagi mablag‘larning aniq miqdori noma’lum, ammo Washington Post ma’lumotlariga ko‘ra, bu milliardlab dollarni tashkil qiladi.
AQSh milliy xavfsizlik bo‘yicha maslahatchisi Jeyk Sallivanning so‘zlariga ko‘ra, Vashington “Tolibon”ni Afg‘onistondagi qonuniy hokimiyat sifatida tan oladimi yoki yo‘q, buni aytishga hali erta.
Rossiya prezidentining Afg‘oniston bo‘yicha maxsus vakili, Tashqi ishlar vazirligining ikkinchi Osiyo departamenti direktori Zamir Kabulov esa Moskva bunga shoshilmasligini ta’kidladi. Kanada va Yevropa Ittifoqi rasmiylari “Tolibon” hokimiyatini tan olishga tayyor emasligini ma’lum qilgan.
Yevropa Ittifoqi “Tolibon”ning Afg‘onistondagi g‘alabasini tan oldi. Biz ular kim bo‘lishidan qat’i nazar, Kobuldagi rasmiylar bilan muloqotni yo‘lga qo‘yishimiz kerak. ‘Tolibon’ urushda g‘alaba qozondi, biz ular bilan muloqot qilishimizga to‘g‘ri keladi”, — deyiladi Yevroittifoq tashqi ishlar vazirligi bayonotida. Shu bilan birga, gap “Tolibon” Afg‘onistonning qonuniy hukumati sifatida rasman tan olinishi haqida ketmayotgani aytilgan.
Izoh (0)