15-avgust sanasida “Tolibon” harakati Kobulni egalladi va butun Afg‘onistonni o‘z nazorati ostiga oldi. Mamlakat prezidenti Ashraf G‘ani qochib ketdi. “Tolibon” Afg‘onistonda islom amirligini tuzishini e’lon qildi. Bu esa o‘z navbatida Afg‘onistondagi ayollar futbol terma jamoasiga ta’sir o‘tkazmasdan qolmadi. Afg‘on ayollari endi futbol o‘ynay olmasligi oydinlashdi.
“Tolibon” hukumatga kelganidan so‘ng ayollar huquqlari ham shariat asosida himoya qilinishiga va’da berdi. “Ayollar shariat qoidalari asosida yashaydi. Qo‘shni mamlakatlar va jahon davlatlari bizni ayollar huquqlarini tan olmaydi deb o‘ylamasliklari kerak. Shukurki, biz musulmonlarmiz va ayollarimiz ham musulmon”, — dedi harakat vakili Zabihullo Mujohid.
Undan tashqari “Tolibon” ayollar bemalol ishlay olishi, eng asosiysi, ular chodra kiyishi lozimligini ta’kidladi. BBC xabariga ko‘ra, bu va’dalar haqiqatga to‘g‘ri kelmayapti. Misol uchun Qandahor bankida faoliyat yuritadigan ayollarga endi ularning ishlarini erkaklar qilishi aytilgan. Boshqa viloyatlarda esa ayollar yolg‘iz o‘zlari ko‘chaga chiqishi taqiqlangani aytilmoqda.
Bir jihat aniq — ayollar chodrada futbol o‘ynay olmaydi. Bu haqda Afg‘oniston milliy terma jamoasining sobiq sardori Holida Popal o‘z fikrlarini bildirdi. Uning so‘zlariga ko‘ra, futbolchilar sarosimada, yig‘layapti va uydan chiqolmayapti.
Ular yig‘layapti, shunchaki yig‘layapti. Sarosimada qolgan ayollar kimga savol berishni bilmayapti. Futbolchilar bilan bo‘layotgan voqealar — adolatsizlik. Ularning barchasi uyini tark etdi va qarindoshlarining uyiga yashiringan. Chunki ularni futbolchi ekanini qo‘shnilar biladi. Ayollar yashiringan va qo‘rquv ostida. “Tolibon” qo‘rquv uyg‘otib, ko‘chalarni aylanib yuribdi.Bu yuragimni yaralaydi, chunki biz shuncha yil ayollar huquqlari uchun kurashgandik. Endi esa shogirdlarimga jim bo‘lishni va yashirinishni aytyapman. Ularning hayoti xavf ostida.
Ular derazadan turib videoga olmoqda va “Tolibon” yaqin ekanligini aytmoqda. Bu juda achinarli. Hukumatning taslim bo‘lganini ko‘rish og‘ir. Ayollar umidini yo‘qotdi.
Holida Popal, murabbiy
“Ayollar jamoalari ichida FIFA reytingida 152-o‘rinni egallab turgan Afg‘oniston terma jamoasi endi maydonga qaytishini tasavvur qilish qiyin”, — deya Popalning so‘zlariga qo‘shimcha qiladi CBC.
Afg‘onistondagi vaziyat borasida FIFA bayonot berdi:
“Afg‘onistondagi holat juda xavotirli. FIFA vaziyatni kuzatyapti. FIFA hanuz futbol rivoji, xususan, Afg‘oniston ayollar futbolini jadal rivojlantirish tamoyiliga sodiq qolmoqda. Shu maqsadda 2016-yildan buyon ushbu hududga futbol rivoji uchun investitsiya kiritilyapti.
Afg‘onistondagi holat bunday ko‘rinish olishi achinarli. Bu borada turli tomonlar, jumladan, Afg‘oniston futbol federatsiyasi bilan ham aloqadamiz va vaziyatni kuzatamiz. Qo‘limizdan kelgancha qo‘llab-quvvatlaymiz”.
Afg‘oniston ayollar terma jamoalari so‘nggi yillarda Osiyo mintaqasidagi barcha musobaqalarda ishtirok etib kelayotgandi. Markaziy Osiyo futbol assotsiatsiyasi (CAFA) tasarrufida o‘tkazilayotgan musobaqalarda ham afg‘on vakillari faol edi. Misol uchun 2021-yilda U-17 va U-20 ayollar terma jamoalari o‘rtasidagi CAFA musobaqalarida Afg‘oniston vakillari ishtirok etdi. Afg‘oniston U-23 ayollar terma jamoasi 18—27-avgust kunlari o‘tkazilishi belgilangan CAFA U-23 Women’s Championship’da ishtirok etishi, bu musobaqa doirasidagi 1-tur o‘yinida 20-avgust kuni O‘zbekistonga qarshi maydonga tushishi kerak edi. Biroq O‘FA matbuot xizmatining “Daryo”ga ma’lum qilishicha, Tojikistonda o‘tishi belgilangan ushbu musobaqa noma’lum sabablarga ko‘ra bekor qilingan.
Afg‘oniston paralimpiya delegatsiyasi 24-avgust kuni Tokioda boshlanadigan Paralimpiadada ishtirok eta olmaydi. Bu haqida Olimpiada tashkiliy qo‘mitasi direktori Toshiro Muto xabar qildi.
“Afsuski, Afg‘oniston terma jamoasi Paralimpiada o‘yinlarida ishtirok eta olmaydi. Buning sababi u yerdagi vaziyat. Chuqur qayg‘udaman. Sportchilar va delegatsiya a’zolari xavfsiz joyda bo‘lishini tilab qolaman”, — deydi Muto.
Izoh (0)