MakSim, Uitni Xyuston va ovozidan ayrilgan boshqa xonandalar

Ovoz – xonandalarning asosiy quroli. Shuning uchun uni yo‘qotish har qanday ijrochining eng katta qo‘rquvlaridan biridir. Afsuski, ba’zida stress, kasallik yoki boshqa sabablarga ko‘ra bu kabi hodisa sodir bo‘ladi. Wday.ru nashri ana shunday  ovozini yo‘qotgan mashhur qo‘shiqchilarning bir nechtasini taqdim etdi.

MakSim

Qo‘shiqchi ikki oydan ko‘proq vaqt davomida sun’iy nafas olish apparatiga ulangan va tibbiy komada bo‘lgan. Hozirda xonanda tuzalish jarayonida. U kasallikdan to‘liq qutulish uchun ko‘p harakat qilishi kerak bo‘ladi. Doktor, tibbiyot fanlari nomzodi Andrey Andriyevskiy MakSimning sog‘lig‘i haqida fikr bildirdi. Unga ko‘ra, Marina hech qachon qo‘shiq aytolmaydi. Koronavirus infeksiyasi tufayli alveolalarda, gaz almashinuvi to‘g‘ridan to‘g‘ri sodir bo‘ladigan o‘pka to‘qimasida jarayon buzilgan. Bunday holatda odam qo‘shiq aytolmaydi va og‘ir jismoniy mashg‘ulotlarga dosh berolmaydi. Xonandaning salomatligi tiklanishi uchun uzoq oylar kerak bo‘ladi.

Adel

2011-yilda Adel paylar bilan bog‘liq muammolar tufayli ovozini yo‘qotgan, shuning uchun taqdim etilishi kutilayotgan konsertlarini bekor qildi. Xonanda sahnaga chiqish paytida ovozini yo‘qotgan, konsert uning ovoz payidan qon ketishi tufayli to‘xtatilgan. Yulduz operatsiya qilingandan so‘ng ovozi qayta tiklangan. Shuningdek, shifokorlar xonandani ovoz payini zo‘riqtirishni to‘xtatmasa, u ovozini butunlay yo‘qotishi mumkinligi haqida ogohlantirgan.

Selin Dion

2012-yilda Selin Dion deyarli ovozsiz qoldi. Gap shundaki, o‘sha paytda mashhur xonanda virusli kasallikka chalingan edi, shuning uchun uning paylari shu qadar zaiflashganki, qo‘shiqchi nafaqat qo‘shiq aytish, balki gapira olmay qolgan. “Bir kuni ertalab men qo‘shiq aytmoqchi bo‘ldim, – deydi afsonaviy xonanda keyinchalik intervyusida, – lekin ovozim menga bo‘ysunmayotganini tushundim”.

Kristina Agilera

Bir necha yil oldin mashhur xonanda paylari zararlangani uchun ovozini yo‘qotgan. Keyinchalik yulduz barcha konsertlarini bekor qilishga majbur bo‘ldi. Qo‘shiqchi sog‘ayib ketgan bo‘lsa-da, avvalgi ovozini qaytara olmadi.

Uitni Xyuston

2000-yilda xonanda sahnada ovozidan ayrildi. Shifokorlar darhol sababini aniqladi: surunkali asabiy stress va giyohvandlik.

Alla Pugachyova

Rossiya yulduzi ovozini butkul yo‘qotmadi, lekin uning chekishga qaramligi tufayli ovozi juda o‘zgarib ketdi. Muxlislarning fikricha, agar xonanda sog‘lom turmush tarzini olib borganida, ohangdor ovozi bilan uzoqroq yashar edi.