Afg‘onistondan AQSh fuqarolarini evakuatsiya qilish uchun zarur bo‘ladigan bo‘lsa, Amerika qo‘shinlari u yerda 31-avgustdan keyin ham qolishi mumkin. Bu haqda AQSh prezidenti Jo Bayden ABC telekanaliga bergan intervyusida ma’lum qildi. Avvalroq u ushbu sanani qo‘shinlarni olib chiqib ketish uchun yakuniy muddat deb belgilagan edi.
“Amerikaliklar shuni tushunishi kerakki, biz bu jarayonni 31-avgustgacha tugatishga harakat qilamiz, — dedi Bayden. — … agar u yerda haliyam Amerika fuqarolari bo‘lsa, biz ularning barchasini olib ketish uchun qolamiz”.
Prezidentning so‘zlariga ko‘ra, Afg‘onistondan evakuatsiya qilish kerak bo‘lgan amerikaliklar soni 10-15 ming nafarni tashkil qilmoqda. AQSh, shuningdek, o‘z ittifoqchilarini — kamida 65 ming afg‘onistonlikni ham olib ketishni umid qilmoqda.
Bundan tashqari, Baydenning aytishicha, Amerika qo‘shinlarini Afg‘onistondan olib ketishda tartibsizlik yuzaga kelmasligining iloji yo‘q edi. “Qo‘shinlarni olib ketish bilan bog‘liq vaziyatdan tartibsizlik yuzaga kelmagan holda chiqib ketish mumkin, degan fikrga qo‘shilmayman”, — dedi Bayden.
Davlat rahbarining so‘zlariga ko‘ra, uning ma’muriyatidagilar “Tolibon” harakatining keyingi qadamlarini oldindan ko‘ra olmagan.
Aprel oyida Bayden Amerika qo‘shinlarining barchasini Nyu-York va Vashingtonda 2001-yil 11-sentabrda yuz bergan teraktlarga 20 yil to‘ladigan kungacha olib chiqib ketishni va’da qilgan edi. Keyinroq muddat 31-avgustga surildi. Iyulga kelib, Afg‘onistondan AQSh harbiy kontingentining 90 foizi chiqib ketdi. Shundan keyin “Tolibon” hukumat harbiy kuchlariga qarshi hujumlarni kuchaytirdi. 15-avgust kuni jangarilar Kobuldagi prezident saroyiga kirdi va Afg‘onistonni to‘liq egallab olganini e’lon qildi. Prezident Ashraf G‘ani mamlakatdan qochib ketdi.
Izoh (0)