Afg‘onistonlik qochoqlar o‘zbek—afg‘on chegarasidan o‘tgan Amudaryoni baklashkalardan yasalgan sollarda kesib o‘tmoqda. Bu haqda “TASS” nashri Termizdagi manbasiga tayanib xabar berdi.

Ma’lum qilinishicha, so‘nggi kunlarda bir necha guruh afg‘on qochoqlari noqonuniy ravishda O‘zbekiston hududiga o‘tgan, shu bilan birga, mutaxassislar formadagi qurollangan odamlar Amudaryodan suzib o‘tganiga hayron. “Aniqlanishicha, afg‘onlar oqimi tez bo‘lgan yetarlicha chuqur daryodan suzib o‘tishda suv uchun mo‘ljallangan va yetarlicha yuk ko‘tarishga qodir bo‘sh baklashkalardan yasalgan sollardan foydalanmoqda”, — deydi manba.

Uning qo‘shimcha qilishicha, bu kabi arzon, samarali, yengil, ovoz chiqarmaydigan va ishonchli suzish vositasini boshqarish oson. “Sanoqli daqiqalarda daryoni suzib o‘tgan qonunbuzarlarning barachasi chegarachilarimizga taslim bo‘lgan”, — deya ta’kidlaydi manba.

Avvalroq Surxondaryo viloyati Mudofaa ishlari boshqarmasi vakili “Daryo” muxbiri bilan suhbatda Sherobodga Afg‘oniston samolyoti qulaganini qisman tasdiqlagandi. “Ko‘zim bilan ko‘rganim yo‘q, ammo samolyot bor deyishdi”, — deydi boshqarma vakili.

Keyinroq Bosh prokuratura Afg‘onistonning 22 ta harbiy samolyoti va 24 ta harbiy vertolyoti 14—15-avgust kunlari O‘zbekiston havo hududi chegarasidan noqonuniy o‘tganini ma’lum qildi. Idoraning ta’kidlashicha, barcha samolyotlar Termiz xalqaro aeroportiga majburiy qo‘ndirilgan, ularning bortida jami 585 nafar afg‘onistonlik qurollangan harbiy xizmatchilar bo‘lgan.