“Viloyatlik bo‘lganim uchun to‘xtatdingizmi?!” Toshkentda haydovchi va YPX xodimi o‘rtasida tortishuv sodir bo‘ldi
Ijtimoiy tarmoqda “Viloyatlik bo‘lganim uchun to‘xtatdingizmi?!” sarlavhali video tarqaldi. Mazkur holat yuzasidan Toshkent shahar IIBB ma’lumot berdi.
Qayd etilishicha, 2021-yil 6-avgust kuni taxminan soat 15:00 da Uchtepa tumani Lutfiy ko‘chasida “Xavfsiz poytaxt” maxsus tadbiri davomida Toshkent shahar IIBB xodimlari tomonidan 36 yoshli N.K. boshqaruvidagi Nexia-2 (davlat raqami 50 V 526 RA) avtomobili to‘xtatilgan.
Haydovchining roziligi bilan xolislar guvohligida transport vositasining yukxonasi tekshirilgan. Tekshiruv yakunlangach haydovchidan noqulayliklar uchun uzr so‘ralgan.
“Shunga qaramasdan N.K.ning o‘zi tekshiruvdan noroziligini bildirib, shoshib turganini bildirgan. Ushbu holatda poytaxtning barcha mehmonlari va aholisi uchun eslatma: bu kabi tadbirlar avvalambor sizni asraydi.
O‘z vaqtida topilgan qurollar va giyohvandlik vositalari yomon oqibatli voqealardan himoya qiladi. PPX va YPX xodimlari aynan sizning avtomobilingiz xavfsiz ekanini oldindan bilmaydi, shuning uchun sizni tekshirishlari mumkin. Bularni to‘g‘ri tushunishingiz lozim.
Shuningdek, videoda haydovchi uning avtomobilining davlat raqamlari viloyatga tegishli bo‘lgani sababli to‘xtatilgani haqida fikr bildirgan. Bu fikr o‘rinsiz va xatodir: Toshkent shahar IIBB manbalarida poytaxt avtomobillari haydovchilari tekshirilganliklari haqida yuzlab xabarlar mavjud.
Biz ijtimoiy tarmoq foydalanuvchilaridan turar joy bo‘yicha kamsitish holatlari to‘g‘risidagi xabarlarni qo‘llab-quvvatlamasliklarini so‘rab qolmiz: bunday fikrlar mualliflarning komplekslaridan yoki ushbu mavzuni ko‘tarib mashhur bo‘lish niyatidan kelib chiqadi. Barchamiz – bir yurt aholisimiz”, – deyiladi shahar IIBB xabarida.
Bundan avval Yo‘l-patrul xizmatining maxsus avtomobili “vstrechniy” yurgani yuzasidan YHXBB ma’lumot bergani, Toshkentda piyodalar yo‘lagidan o‘tish vaqtida telefonda gaplashgan blogerga chora ko‘rmagan YPX xodimlariga intizomiy jazo belgilangani hamda Jizzaxda niqobni to‘liq taqishga majbur bo‘lmagan YPX xodimiga nisbatan xizmat tekshiruvi tayinlangani haqida xabar berilgandi.
