O‘zbekiston va Afg‘onistonni bog‘lab turuvchi Termiz—Hayraton (“Do‘stlik”) ko‘prigidagi vaziyat 15-avgust kuni soat 10:00 holatiga ko‘ra yumshadi. Bu haqda O‘zbekiston Tashqi ishlar vazirligining rasmiy vakili Yusup Kabuljanov tomonidan e’lon qilingan bayonotida ma’lum qilingan.
Ko‘prikning Afg‘oniston qismida to‘plangan Afg‘oniston fuqarolarining asosiy qismi ko‘prikni va unga tutash hududni mustaqil ravishda tark etgan. Bunga faol siyosiy va diplomatik sa’y-harakatlar, shuningdek, olib borilgan tushuntirish ishlari natijasida erishildi, — deyiladi vazirlik bayonotida.14-avgust kuni Afg‘oniston shimolidagi Mozori-Sharif shahri (Termizdan 58 kilometr janubda joylashgan) “Tolibon” qo‘liga o‘tgani ma’lum bo‘lgandi. Shahar topshirilgach, Afg‘oniston mudofaa va xavfsizlik kuchlari O‘zbekiston bilan chegara tomon chekingan, 15-avgustga o‘tar kechasi Hayraton va Termiz oralig‘idagi ko‘prikda yuzlab afg‘onistonliklar to‘plangan.
15-avgust tongida O‘zbekiston tomoni Afg‘oniston Qurolli Kuchlarining harbiy xizmatchilaridan iborat 84 kishilik guruhni qabul qilgani (ular orasida uch nafar yarador ham bo‘lgan), ular DXX Chegara qo‘shinlari tomonidan qo‘lga olinib, O‘zbekiston hududida vaqtincha bo‘lib turishi tashkil etilgani ma’lum bo‘ldi. O‘zbekiston rasmiylarining ma’lum qilishicha, Afg‘oniston bilan chegarada barcha xavfsizlik choralari ko‘rilgan.
Izoh (0)