YouTube’dagi Kidd in a Sweet Shop kanalida McLaren poyga jamoasining rahbari Zak Braun fotomodel Jodi Kiddga o‘zining shaxsiy sportkarlar kolleksiyasini namoyish etgani tasvirlangan video paydo bo‘ldi. Britaniya jamoasi rahbarining kolleksiyasidan bir necha “Formula-1” bolidlari, shuningdek, boshqa poyga seriyalaridagi mashinalar o‘rin olgan. Har bir avtomobilda qachonlardir jahon chempionlari harakatlangan, deb xabar beradi Motor.
Zak Braunning kolleksiyasidan 1978-yilda amerikalik avtopoygachi Mario Andretti “Formula-1” chempioniga aylangan Lotus 79 modeli o‘rin olgan. Shuningdek, britaniyalikning garajida 1991-yilda Ayrton Senna “Qirollik poygasi” g‘olibiga aylangan McLaren MP4/6, shuningdek, 2001-yilda Mika Xakkinen Buyuk Britaniyadagi Gran-prini yutgan McLaren MP4-6 mavjud. Ushbu modellar kolleksiyada tasodifan paydo bo‘lmagan. Braunning so‘zlariga ko‘ra, ushbu avtomobillarni uning uch nafar eng yaxshi ko‘rgan poygachisi boshqargan.
Zak Braunning kolleksiyasidan “Formula-1” bolitlaridan tashqari boshqa poyga seriyalarida g‘oliblikni qo‘lga kiritganlarning bir necha avtomobillari ham o‘rin olgan. Masalan, britaniyalikning jamlanmasida Can-Am poygalarida finishga birinchi bo‘lib yetib kelgan Porsche 962 va McLaren M8D ning prototiplari bor. Bundan tashqari, Braun braziliyalik sportchi Emerson Fittipaldi 1988-yilgi Indy 500 poygalarida birinchilikni qo‘lga kiritgan sportkarga ham egalik qiladi.
Kolleksiyadagi deyarli barcha sportkarlar to‘liq restavratsiyadan o‘tgan. Faqatgina 1977-yilda Monako Gran-prisida g‘oliblikni qo‘lga kiritgan Walter Wolf Racing jamoasining bolidi bundan istisno. Transport vositasi o‘sha vaqtda trassani tark etgan holatda saqlanmoqda.
Avvalroq Kiprda Mazda RX’ning eng katta xususiy kolleksiyasi restavratsiyaga muhtoj holda topilgani, Kaliforniyada noyob Porsche’lar bilan to‘la hashamatli garajga ega uy sotuvga qo‘yilgani to‘g‘risida xabar berilgandi.
Izoh (0)