Tokio—2020 Olimpiadasida softbol bo‘yicha mamlakat terma jamoasi tarkibida g‘oliblikni qo‘lga kiritgan yaponiyalik sportchi Miu Goto yangi oldin medalga ega bo‘ladi. Bunga topshirilgan oltin medalni Nagoya shahrining 72 yoshli meri Takashi Kavamura tishlab ko‘rgani sabab bo‘lgan, deb xabar beradi Esquire.
Mer sportchi bilan uchrashuvda koronavirus cheklovlariga rioya qilmagan holda turgan, oltin medalni taqib olib, niqobini yechgan holda mukofotni tishlagan.
Shundan so‘ng shahar hokimligiga merning bu kabi xatti-harakatidan 7 mingdan ortiq shikoyat kelib tushgan. “U sportchilarga hurmatsizlik qildi. U sportchilar koronavirus sabab hatto taqdirlash marosimida o‘z medallarini o‘zlari yoki jamoadagi sheriklari tomonidan taqilganiga qaramay, mukofotni tishlab oldi”, — deb yozadi qilichbozlik bo‘yicha Pekin va London Olimpiadalarida kumush medalni qo‘lga kiritgan Yuki Ota.
Shuningdek, softbol bo‘yicha jamoaga egalik qiluvchi Toyota kompaniyasi ham merning bu harakatini qoralagan.
Keyinroq Kavamura qilgan ishidan kechirim so‘rab chiqqan. “Men Nagoya meri lavozimida ekanligimni unutib qo‘ydim va oqilona ish tutmadim”, — degan u. Shuningdek, merning aytishicha, u medalning qayta almashtirilishiga ketadigan mablag‘ni to‘lab berish niyatida. Biroq oxir-oqibat xarajatlar Xalqaro olimpiya qo‘mitasi tomonidan qoplanadigan bo‘ldi.
Avvalroq Olimpiadada oltin medalni olgan xitoylik sportchilarga Hongqi H9 limuzinlari sovg‘a qilinishi to‘g‘risida xabar berilgandi.
Izoh (0)