Toshkentda qovun-tarvuz sotuvchisi va IIB xodimlari o‘rtasida janjal aks etgan video yuzasidan izoh berildi

Ijtimoiy tarmoqlarda bir necha IIB xodimlari qovun-tarvuz sotilayotgan joyda fuqaroni qo‘lga olishga urinayotgani aks etgan “Navbat bechora dehqonlarga keldimi deyman” sarlavhali video tarqaldi. Toshkent shahar IIBB holatga izoh berdi.

Ma’lum qilinishicha, holat 5-avgust kuni soat 18:10 da Toshkentning Yangihayot tumanida yuz bergan. Tursunzoda ko‘chasidagi yo‘l chetida Sh.G. poliz ekinlarini sotish maqsadida terib qo‘yib, bu bilan jamoat tartibini buzgan.

Toshkent shahar IIBB xodimlari tekshirish maqsadida Sh.G.dan shaxsini tasdiqlovchi hujjatlarini va savdo qilish huquqini beruvchi ruxsatnomani taqdim etishini so‘rashgan. Ammo fuqaro IIO xodimlarining qonuniy talablarini mensimay, ularni uyatli gaplar bilan haqorat qilgan va javobgarlikdan qutulib qolish niyatida atrofdagilarning e’tiborini tortmoqchi bo‘lgan.

Oqibatda fuqaroga nisbatan Ma’muriy javobgarlik to‘g‘risidagi kodeksining 183-moddasi (mayda bezorilik) va 194-moddasi (ichki ishlar organlari xodimining qonuniy talablarini bajarmaslik) bo‘yicha bayonnoma rasmiylashtirilgan va hujjatlar qonuniy chora ko‘rilishi uchun sudga topshirilgan.

Sudning qaroriga ko‘ra, fuqaroning xatti-harakatlariga Toshkent shahar IIBB xodimlari tomonidan to‘g‘ri baho berilgan va fuqaro aybiga iqror bo‘lgani sababli unga nisbatan Ma’muriy javobgarlik to‘g‘risidagi kodeksning 34-moddasiga (bir necha huquqbuzarliklarni sodir etganlik uchun ma’muriy jazo qo‘llanish) muvofiq besh kunlik qamoq ko‘rinishidagi jazo tayinlangan.

Poytaxt IIBB xabarida qayd etilishicha, ichki ishlar organlariga har yili iyul va avgust oylarida yo‘l harakati qatnashchilari nomidan yo‘llarda noqulaylik va xavf tug‘dirayotgan tarvuz va qovun sotuvchilariga nisbatan noroziliklar kelib tushadi.