12-avgust kuni taniqli aktrisa, O‘zbekistonda xizmat ko‘rsatgan artist Ra’no Shodiyeva tug‘ilgan kunini nishonlamoqda. Shu munosabat bilan aktrisa ijrosidagi eng muvaffaqiyatli loyihalar haqida so‘z yuritamiz.
“Shaytanat” serialidagi Zaynab obrazi
19 yoshida “Shaytanat” serialida Asadbekning zo‘rlangan, giyohvand moddalarga o‘rganib qolgan qizi Zaynab rolini ijro etgan Ra’no Shodiyeva shu roli bilan Yodgor Sa’diyevni yurak xurujidan asrab qolgan. O‘sha kunlarni Yodgor Sa’diyev quyidagicha eslaydi.
Bu masalada yuragim xuruj qilishiga ozgina qolgan. Bu ishlangan narsa, men buni aniq bilaman. Hozir gapirishni hojati ham yo‘q. Zaynab rolini ijro etayotgan Navro‘za Biynozova keldi-da, men hali turmushga chiqmaganman, u qiz “narkoman” bo‘lar ekan, dedi. Lekin sen o‘qigan eding-ku! Yo‘q, men o‘ynamayman degan. Ana undan so‘ng menda juda katta muammo paydo bo‘ldi. Keyin o‘ylay boshladim. Ochig‘ini aytsak, o‘zi boshida Navro‘za Biynozovani Zaynab rolini o‘ynashini xohlamagan edim. Buni shunaqa qilib o‘tkazishdi. Tohir Malikni ham o‘rtaga qo‘shib, oxiri Tohir aka bo‘ladi-ku, yaxshi-ku, deganiga badiiy rahbar sifatida mayli deganman.Keyin baxtimga Ra’no Shodiyeva chiqdi. Men unga aytganman, mana shu rolni o‘ynaysan, keyin sen Ra’no Shodiyeva bo‘lasan. Xalqqa tanilasan, unvonlar ham olasan, deganman. Bu gap uning esidami, yo‘qmi, bilmadim. Lekin Ra’no unaqa emas, u biladi.
Yodgor Sa’diyev, O‘zbekiston xalq artisti
“Chimildiq” filmidagi kelinchak
Ra’no Shodiyeva aktyor Said Muhtorov bilan birgalikda suratga tushgan “Chimildiq” telefilmi ham millionlab muxlislarga ega asar hisoblanadi.
“Vatan” filmida Gunafsha
Rejissor Zulfiqor Musoqov tomonidan 2006-yilda suratga olingan “Vatan” filmida Gunafsha roli Ra’no Shodiyeva ijodida alohida o‘rin tutadi. Gunafsha tomonidan aytilgan so‘zlar tomoshabinlarga yod bo‘lib ketgan.
“O‘tov”da soqov qiz Zaynab
Ra’no Shodiyeva 2007-yil rejissor Ayub Shahobiddinov tomonidan suratga olingan “O‘tov” kartinasida esa kutilmagan ijro — gung qiz Zaynab rolini katta mahorat bilan ijro etgan.
“Qizg‘aldoq”da hammani yig‘latgan Nigora
Ibrohim Rasulov tomonidan suratga olingan “Qizg‘aldoq” filmida Ra’no Shodiyeva kasalmand ayol Nigora rolini katta mahorat bilan ijro etgan. Aktrisa ushbu filmda O‘zbekiston xalq artisti Og‘abek Sobirov bilan partnyor bo‘lgan. Filmda Og‘abek Sobirov taksichi Otabek rolini ijro etgan.
“Maktub” filmidagi Nigina
2013-yilda suratga olingan “Maktub” filmida aktyor Bobur Yo‘ldoshev bilan partnyor bo‘lgan.
“Baron”da fohishaning opasi, jabrdiyda ona rolida
Rustam Sa’diyevning “Baron” filmida aktrisa Ra’no Shodiyeva odam savdosi bilan shug‘ullanib, giyohvand moddalar sotadigan, o‘zini ham pullaydigan Ro‘zigulning soddagina opasi, ayni vaqtda bolasi uchun singlini ham o‘ldirishga tayyor ona obrazini gavdalantirgan.
“Mendirman Jaloliddin”da Jaloliddinning onasi Oychechak rolida
Ra’no Shodiyeva turk kinoijodkorlari bilan hamkorlikda suratga olingan “Mendirman Jaloliddin” tarixiy serialida Jaloliddin Manguberdining onasi, Xorazmshoh Alovuddin Muhammadning xotini Oychechak rolini ijro etgan.
Ma’lumot uchun, Ra’no Shodiyevaning Diyor, Raxshona va Amirxon ismli farzandlari bor. Aktrisa 23-iyul kuni o‘g‘li Diyorni uylantirdi. U hozirda qizi Raxshonaning to‘yiga tayyorgarlik ko‘rmoqda.
Izoh (0)