Britaniya rasmiylari Jeronimo laqabli sakkiz yoshli alpakada yirik shoxli qoramollarda uchraydigan sil kasalligi aniqlangani sabab uni inyeksiya yordamida o‘ldirish bo‘yicha qaror qabul qildi. Hayvonning himoyasi uchun petitsiya imzolanmoqda va ko‘chalarga mashrga chiqilyapti, deb xabar beradi Esquire.
Alpakaning egasi — Xelen Makdonald bo‘lib, u 15 yildan buyon Glostershirdagi fermasida hayvonlarni urchitish bilan shug‘ullanib keladigan veterinar-hamshira. U Jeronimoni Yangi Zelandiyadan Britaniyaga 2017-yilda olib kelgan, biroq silga topshirgan ikkita testi ham ijobiy chiqqani sabab mamlakatga kelganidan buyon karantinda saqlanmoqda.
Yirik shoxli qoramol sili — boshqa hayvonlarga va hatto insonlarga yuqishi mumkin bo‘lgan xavfli kasallik. Infeksiya sabab Buyuk Britaniyada har yili minglab yirik shoxli qoramollar yo‘q qilinadi.
Makdonald Jeronimoning testlariga shubha bildirib, hayvon tahlillardan oldin silga emlangan bo‘lsa, yolg‘on natijalarni chiqarishi mumkinligini ta’kidlayapti. Jeronimo ushbu infeksiyaga qarshi emlangan. Yangi Zelandiyada topshirilgan testlar javobi salbiy chiqqan.
Alpaka egasi silga yangi, biroq boshqa turdagi test o‘tkazilishini talab qilmoqda. Ammo hukumat o‘tkazilgan tadqiqotlar yuqori samarador ekanini va u faqatgina 0,34 foiz holatda yolg‘on natija ko‘rsatishi mumkinligini qayd etmoqda. O‘tgan hafta Makdonald London yuqori sudida apellyatsiyani yutqazib qo‘ydi va endilikda uning hayvoni 30 kun ichida o‘ldirilishi kerak.
Jeronimoning himoyasiga o‘n minglab britaniyaliklar chiqqan, jumaladan, mamlakat bosh vazirining otasi Stenli Jonson ham. Alpakani qutqarish bo‘yicha petitsiya 100 mingdan ortiq imzo to‘plagan. London aholisi, shuningdek, hayvonni o‘ldirish talabini kechiktirish va yangi test o‘tkazishni talab qilmoqda.
Atrof-muhit vaziri Jorj Yustis Jeronimoni o‘ldirish borasidagi qarorni qiyin, biroq “zaruriy” deb atagan. Bundan tashqari, u tadqiqotlar ishonchliligini ma’lum qilgan va buni qirollik bosh sanitar shifokori Kristin Middlmiss tasdiqlagan. Shu sababli rasmiylar Jeronimoni qayta testdan o‘tkazishdan bosh tortmoqda.
Avvalroq yunglari olingani sabab ingichka oyoqlarga ega uchayotgan boshga aylangan alpakalar videosi e’lon qilingandi.
Izoh (0)