O‘zbekiston Xalq demokratik partiyasi saylovoldi dasturiga ishsizlik, uy-joy muammosi, oziq-ovqat mahsulotlarining narxi nazoratsiz oshib ketishining oldini olish kabi qator masalalarni kiritgan. Bu haqda 7-avgust kuni bo‘lib o‘tgan XDP markaziy kengashining navbatdan tashqari plenumida partiya tomonidan prezidentlikka nomzod sifatida tavsiya etilgan Maqsuda Vorisova ma’lum qildi, deya xabar bermoqda “Daryo” muxbiri.
“Prezidentlik sayloviga o‘z dasturimiz bilan kirib boryapmiz. Bugungi kunda juda dolzarb bo‘lib turgan global o‘zgarishlar, pandemiya davrida yuzaga kelgan iqtisodiy tanglik oqibatida xalqning kambag‘allashib ketishining oldini olish, jamiyatdagi kambag‘allikni qisqartirish, aholiga ish o‘rinlari yaratish va, ayniqsa, ayollar masalasini hal qilish, xotin-qizlar bandligini ta’minlash, ularning manfaatlarini himoya qilish bo‘yicha aniq vazifalarni o‘z oldimizga qo‘yganmiz va ularni amalga oshirish uchun, albatta, kurash olib boramiz”, — dedi u.
Vorisova o‘z maqsadlari haqida qisqacha gapirgach, tadbirdan so‘ng OAV vakillariga intervyu berdi.
– Prezidentlik saylovlaridan nimani xohlayapsiz yoki orzu qilyapsiz?
— Birgina men emas, ko‘p ming sonli Xalq demokratik partiyasi ham saylovda g‘alaba qozonishni va o‘zining dasturiy vazifalarini amalga oshirishni nafaqat orzu, balki maqsad ham qilib qo‘ygan.
— O‘zbekiston boshqaruvini ayol kishiga topshirilishiga va xalqning ishonishiga ko‘zingiz yetyaptimi?
— Bu shaxsga nisbatan bo‘lgan ishonch emas, bu partiyaning g‘oyalari, maqsadlari va dasturimizga bo‘lgan ishonch. Xalq bizdan uni bugun qiynab turgan muammolarini tizimli hal qilishimizni kutmoqda. Saylovoldi dasturimiz orqali ishsizlik, uy-joy muammosi, kommunal xizmatlardagi tariflar yoki oziq-ovqat mahsulotlarining narxi nazoratsiz oshib ketishining oldini olmoqchimiz.
— G‘olib bo‘lsangiz, islohotlarni nimadan boshlaysiz?
— Yuqorida qayd etganimdek, birinchi navbatda, ishsizlik va bandlik masalasi, ayollarimizni qiynab turgan muammolarga yechim topish va, albatta, ta’lim hamda tibbiyot sohasidagi aholimiz duch kelayotgan dolzarb masalalarni hal qilishdan boshlayman.
— Sizning nomzodingiz ko‘rsatilishida gender tenglik omili hisobga olingan, deb o‘ylaysizmi? Chunki ko‘pchilik katta ehtimol bilan partiya yetakchisi Ulug‘bek Inoyatovning nomzodi qo‘yilsa kerak, degan fikrda edi. Ammo kutilmaganda sizning nomzodingiz e’lon qilindi.
— Partiyamizda gender tenglikka doimo e’tibor berilgan. Men faqat ayol bo‘lganim uchun nomzod qilib ko‘rsatilmadim. Shu xalq orasidan chiqqan oddiy bir ona va ayol bo‘lganim sababli ham, xalqimizning quyi qatlamini qiynab turgan muammolarni ichidan bilganim uchun ham, meni nomzod sifatida ko‘rsatishdi, deb o‘ylayman.
— Davlat organlarida ayol amaldorlarning kamligiga munosabatingiz qanday?
— Birinchi o‘rinda mutaxassislarni to‘g‘ri tanlashga e’tibor qaratishimiz kerak. Tan olishimiz kerak, shu kungacha ko‘proq erkak mutaxassislarga imkoniyat berildi. Gender tenglik deganda, biz nafaqat ma’lum bir kasblarning ayol kishi tomonidan tanlanishini yoki uning lavozimga tayinlanishida ayol bo‘lgani uchun emas, uning tajribasi, saviyasi va bilimiga e’tibor berilishini o‘z dasturimizda ham ko‘rsatib o‘tamiz.
— Statistika qo‘mitasining hisobotiga ko‘ra, O‘zbekistonda aholining o‘rtacha maoshidan 20-30 foiz kamroq pul topadigan ikkita soha vakillari bor: tibbiyot va ta’lim sohasi xodimlari. Bu vaziyatni o‘zgartirish bo‘yicha aniq maqsadlaringiz bormi?
— Dasturimizda bu masala, albatta, ko‘rsatib o‘tilgan. Ushbu sohalarni yetarlicha mablag‘ bilan ta’minlamasak, bugun hammaning tilida bo‘lgan ta’lim va sog‘liqni saqlashda korrupsiya urchigan, degan so‘zdan ketib qola olmaymiz. Albatta, biz bu ikki soha xodimlarini munosib ish haqqi bilan ta’minlashimiz shart.
Izoh (0)