Uitni Xyuston xotirasiga bag‘ishlanadi. Afsonaviy yulduzning so‘nishi tarixi

2021-yilda ajoyib ovoz sohibasi va fojiali taqdir egasi Uitni Xyuston 58 yoshni qarshilagan bo‘lardi.

Uitni Xyustonning onasi Sesiliya mashhur qo‘shiqchi bo‘lgan — u yoshligidanoq Elvis Presli bilan birga sahnaga chiqqan va shu sababdan ham shou-biznesning barcha xavflarini yaxshi tushungan. Sesiliya qizining ulkan iste’dodini darhol payqagan, lekin ancha vaqtgacha qizi hali tayyor bo‘lmagan muammolardan Uitnini himoya qilgan. Uitni onasi va singlisi bilan baptist cherkovining xorida qo‘shiq kuylar, onasi bunday iste’dod xaridorlarining qanchasini rad etganini bilmas edi. Sesiliya Uitni 18 yoshga to‘lganida qizini shou-biznes olamiga olib kirdi: klublarda kuylagan bir necha qo‘shiqlaridan so‘ng, kichik Xyuston keyinchalik qo‘shiqchining uzoq yillik prodyuseri bo‘lgan Kliv Devis bilan shartnoma imzoladi.

Yaxshi qiz

Uitni studiya uchun oltin manbaiga aylandi. Birinchi albom — Whitney Houston bir yilidan so‘ng Billboard 200 chartida birinchi o‘rinni egalladi va yangi ovoz sohibasi “Gremmi” mukofotiga sazovor bo‘ldi. Ikkinchi plastinka platina statusiga ega bo‘ldi. Uitni Xyuston “so‘nggi yillardagi eng yoqimli ovozlardan biri” deb e’tirof etildi. U nafaqat iste’dodli, balki mas’uliyatli ham edi: u har doim intervyu va mashg‘ulotlarga o‘z vaqtida kelar, spirtli ichimliklar bo‘lgan kechalarda qatnashmas va umuman o‘yin-kulgidan ko‘ra karyerasini o‘ylardi.

Bunday “to‘g‘riligi” uchun Xyustonni yoqtirishmadi. 1989-yilda Soul Train Music Awards mukofotini topshirish marosimida Uitni norozilik kayfiyatidagi hushtak sadolari ostida sahnaga ko‘tarildi: hech kim musiqaga ahamiyat bermadi, qo‘shiqchi allaqachon tomoshabinlarni zeriktirgan edi. U bundan qattiq xafa bo‘ldi .

Aynan o‘sha qayg‘uli kechada Uitni New Edition guruhi solisti Bobbi Braun bilan tanishdi. Gettodan chiqqan qora tanli 20 yoshli bu yigit otishmalarda ishtirok etishga, yulduz va noqonuniy bolaning otasi bo‘lishga ulgurgandi. Uitni bilan to‘ydan oldin uchrashgan uch yili mobaynida Bobbining nikohsiz bolalari uchtaga ko‘paygan, lekin u bunga ahamiyat bermasdi.

Uitni va Braunni ikkalasi ham qashshoq bolalikni boshdan kechirishgani tezda til topishishlariga sabab bo‘ldi. Va ular birgalikda omma oldiga chiqa boshlashlari bilan (Uitni Bobbini deb Eddi Merfini tashlab ketgandi) “yaxshi qiz” qiyofasi o‘tmishda qoldi.

1992-yil Uitni Xyuston uchun Bobbi Braun bilan nikohi va Gollivuddagi debyut roli bilan esda qolarli yil bo‘ldi. “Tansoqchi” filmidagi roli uchun u eng yomon aktrisa sifatida “Oltin malina” mukofotini oldi, lekin baribir tom ma’noda u g‘olib edi.  I Will Always Love You qo‘shig‘i Uitni Xyustonga uchta “Gremmi” mukofoti va butun dunyo muxlislarining muhabbatini olib keldi. Ko‘p yillar davomida bu kompozitsiya haqiqiy “sevgi madhiyasi”ga aylandi. Qo‘shiqning bunchalik yurakdan ijro etilishining sababi bor edi: filmni suratga olish paytida Uitni Xyuston homilasidan ayrilgandi.

Qo‘shiqchining yolg‘iz qizi — Bobbi Kristina bir yil o‘tib, 1993-yilda tug‘ildi. Ona bo‘lgach, Uitni qolgan yaxshi xulq-atvoriga ham chek qo‘ydi va hamma narsadan voz kechdi. “Meni hayoti doim shunday bo‘lgan malika deb o‘ylaysizmi? Men gettoda o‘sganman. Ha, men giyohvand moddalar qabul qilaman. Ammo bu ijod qilishimga va yashashimga xalal bermaydi”, — deb tan olgan Xyuston Rolling Stone nashriga bergan intervyusida. 2000 yilda Gavayi aeroportida Uitni va Bobbi Braun yuklaridan marixuana topildi. Berilishi kerak bo‘lgan jazo yoshlarning giyohvandlikka qarshi dasturi foydasiga katta miqdordagi mablag‘ga almashtirildi, lekin bu qo‘shiqchiga dars bo‘lmadi.

Uitni “Oskar” taqdirlash marosimidagi chiqishini barbod qildi, Maykl Jekson musiqiy karyerasining 30 yilligida yomon taassurot qoldirdi va onasining talabiga binoan reabilitatsiyaga yotqizildi. 2006-yil sentabr oyida Uitni Xyuston ajrashish uchun ariza berdi. Bobbi Braun bilan birgalikdagi turmushi uning asosiy narsasi — ajoyib ovoziga ta’sir qilgandi. Ko‘p yillar davomida chekish va spirtli ichimliklar iste’mol qilish natijasida Uitni va uning eri endi odatdagidek qo‘shiq kuylay olmasdilar: ajrashishning asosiy sababi ham shu edi.

Yangi hayot

Uitni baribir avvalgidek yaxshi qiz bo‘la olmadi. Hatto uning yangi albomidan kelgan muvaffaqiyat ham eski Xyustonni qaytara olmadi. Uning muxlislari hali ham konsert zallarini to‘ldirar, I Will Always Love You qo‘shig‘i olqishlar bilan qarshi olinar, mukofotlarga sazovor bo‘lardi, ammo oddiy hayotda qo‘shiqchini tez-tez qo‘lida sigaret va martini bilan ko‘rish mumkin edi.

Va bu o‘z ta’sirini ko‘rsatmay qolmadi. 2010-yilda Uitni Xyuston dunyo bo‘ylab gastrol safariga chiqdi, lekin sog‘lig‘i yomonlashgani sababli uni to‘xtatishga to‘g‘ri keldi.

O‘limidan biroz oldin u navbatdagi reabilitatsiya kursidan o‘tdi. 2012-yil fevral oyida esa u 54-“Gremmi” mukofotini taqdirlash marosimida qatnashishi kerak edi. Marosimga bir hafta qolganida —11 fevral kuni u mehmonxonadagi nomerining yuvish xonasida yuztuban yotgan holda topildi. Keyinchalik mutaxassislarning aniqlashicha, uning yonida oq kukun — kokainli qoshiq bo‘lgan. O‘limidan sal oldin Uitni o‘z stilistiga shunday degandi: “Men shunchaki sevishni va sevilishni xohlayman. Men hech narsa qaramay, hech qanday shartlarsiz Iso kabi sevishni xohlayman”.

Uitnining o‘limidan uch yil o‘tgach, uning yolg‘izgina qizi Bobbi Kristina ham vafot etdi. O‘n sakkiz yoshli qiz miya jarohati tufayli olti oy komada hayot uchun kurashdi, ammo afsuski.... Mazkur fojiada Uitni tomonidan o‘n ikki yoshida asrab olingan Nik Gordon gumon qilindi. Chunki Uitni Nikni o‘z farzandidek ko‘rgan bo‘lsa-da, xonandaning vafotidan keyin yoshlar o‘zlarini aka-singil deb hisoblashmas edi...