Shvetsiyada Devid Gustafsson ismli Lego’ning 21 yoshli muxlisi 2020-yilda Lego Masters ko‘rsatuvida g‘oliblikni qo‘lga kiritib, mahalliy televideniyeda mashhurlikka erishgan edi. Mukofot sifatida unga 370 ming detaldan iborat 1,2 tonnali jamlanma nasib etgan va yigit undan to‘liq o‘lchamli Volvo V70 modelini yig‘ishga qaror qildi. Avtomobilni yig‘ish jarayoni YouTube’da bir necha oy oldin paydo bo‘lgan, biroq rolik SVT telekanalining 6-avgustdagi syujetidan so‘ng, mashhurlikka erishdi. Hozirga qadar ushbu video 111 ming martadan ortiq tomosha qilingan, deb xabar beradi Motor.
Lego’dan V70 modelini yig‘ish loyihasi hali oxiriga yetgani yo‘q, biroq hozirda profil trubalardan qo‘lbola yasalgan rama mavjud bo‘lib, unga bo‘lajak avtomobilning skeleti, to‘liq o‘lchamli g‘ildiraklar va kardanga ega haqiqiy rul chambarali o‘rnatiladi. Qolgan barcha ehtiyot qismlarni Devid Lego’dan yig‘adi. Rejaga ko‘ra, orqa o‘qqa elektromotor o‘rnatiladi, ammo uning texnik tavsifi, bir marta quvvatlanish orqali qancha masofa bosib o‘tishi mumkinligi haqidagi ma’lumotlar oshkor etilmagan.
Ayni vaqtda Gustafsson Bankerid shahridagi o‘z studiyasida ish olib bormoqda va kompaniya uchun Lego konstuksiyalarini yaratish bilan pul topyapti. V70 modelini esa u yil davomida yig‘ib tugatish, shundan so‘ng, Shvetsiya yoki Yevropa bo‘ylab sayohatga olanish niyatida.
Eslatib o‘tamiz, iyun oyida Lego kompaniyasi 400 mingta konstruktor detallaridan tarkib topgan to‘liq o‘lchamli Lamborghini Sian giperkarini taqdim etgandi. Uni yaratish ustida 15 nafar mutaxassis 8660 soat ish olib borgan. 1:1 masshtabdagi o‘yinchoq giperkar Lamborghini Sian FKP 37 modeli dizaynini takrorlaydi.