Surxondaryo viloyatining Sariosiyo tumanida 4 yashar qizaloq Tico urib yuborishidan vafot etdi. Bu haqda viloyat IIB YHXB xabar berdi.
Voqea 4-avgust kuni tumanning “Bog‘iston” MFY hududidan o‘tuvchi 4-N-16 avtomobil yo‘lining 7-kilometrida sodir bo‘lgan. Boshqa shaxsga tegishli Tico’ni ishonchnomasiz, katta tezlikda haydab ketayotgan 22 yoshli yigit yo‘lni kesib o‘tayotgan qizchani urib yuborgan.
Oqibatda qizaloq olgan og‘ir tan jarohatlarida tuman tibbiyot birlashmasi jonlantirish bo‘limida vafot etgan.
Ma’lum bo‘lishicha, vafot etgan qizaloq hodisa sodir bo‘lgan mahallada xolasining uyiga mehmonga kelgan bo‘lgan. U qarovsiz qolib ketishi oqibatida avtomobil yo‘liga chiqib ketgan. Haydovchi esa malakasizligi, mashinada belgilangan tezlikdan ortiq harakatlangani oqibatida ushbu YTH sodir bo‘lgan.
Ma’lumot uchun, O‘zbekistonda 2021-yilning 6 oyida bolalar bilan bog‘liq 542 ta yo‘l-transport hodisasi sodir etilgan bo‘lib, ularda 458 nafar bola jarohatlangan va 104 nafar voyaga yetmagan bola halok bo‘lgan.