Hayotini san’at bilan bog‘laganlarga bir marotaba qiyin bo‘lsa, san’atkor ayollarga ikki marta mushkul. Sababi ham san’atni, ham oilani birdek olib borish oson ish emas. To‘g‘ri, xonanda yoki aktrisalar orasida ikkisiga birdek e’tibor berayotganlari ham bor. Shuningdek, ijoddagi muvaffaqiyatiga qaramay, o‘zini hali oila qurishga tayyor emas deb hisoblashi yoki orzusidagi insonni uchratmaganligi sababli turmushga chiqishni ortga surayotgan ayol xonandalar ham topiladi. “Omon-omon” ko‘rsatuvida o‘zbek shou-biznesining turmushga chiqmagan mashhurlari haqida ma’lumot berildi.
Feruza Normatova
Aktrisa, teleboshlovchi Feruza Normatova bugunga qadar bir necha film, serial va teleko‘rsatuvlarda ishtirok etib, tomoshabinlar ko‘nglidan joy olib ulgurgan. San’atda uni olqishlovchi muxlislari bisyor bo‘lsa-da, haligacha hayotda yolg‘iz. Instagram sahifasiga turli xil sovg‘alar, gullar rasmlarini joylayotgan bo‘lsa-da, oila qurish haqida hech qanday yangilik yo‘q. Eslatib o‘tamiz, Feruza Normatova 1989-yilda tug‘ilgan, u hozirda 32 yoshda. Yaqinda Feruza Instagram orqali muxlislariga o‘zidan kichik insonga turmushga chiqishi mumkinligini ma’lum qilgan edi.
Munisa Rizayeva
Foto: Instagram / @munisarizaeva
Mashhur xonanda doim hammaning diqqat-e’tiborida. Shu jumladan, ko‘pincha uning shaxsiy hayoti muhokamalarga ham sabab bo‘lib kelgan. Kelinlikka nomzod Munisa haqida shu kungacha bolalagan mish-mishlarning birortasi haqiqatga aylanmadi. Bunga xonandaning bo‘lajak kuyovga qo‘yayotgan talablari sababmikan? Bunisi noma’lum. San’at yo‘lida hammasi a’lo darajada, lekin shaxsiy hayoti haqida ham o‘ylashning ayni vaqti. Sevimli xonanda hozirda 35 yoshda.
Kaniza
Xonanda Kanizaning ham atrofi mish-mishlarga to‘la. To‘g‘ri, bundan 5 yil avval u konsert dasturida turmushga chiqayotganini jonli ravishda e’lon qilgan edi. Biroq oradan vaqt o‘tib, nimadir yuz berdimi, bu to‘y unutildi. Hozir xonanda yolg‘iz va ijod qilishda davom etmoqda. Darvoqe, Kaniza bu masalada uzoq jim qolib ketmasa kerak. Tez orada uning shaxsiy hayotiga oid muhim yangilik paydo bo‘lsa, ajab emas. Xonanda 1985-yil Qo‘qon shahrida tug‘ilgan, u bu yil 36 yoshni qarshi oldi.
Sitora Farmonova
Taniqli aktrisa va teleboshlovchi Sitora Farmonova ham o‘z latofati va go‘zalligi bilan, afsuski, hamon oila qurmaganlar safida. Aktrisa haqida ham shov-shuvlar bisyor, lekin uning o‘zi bunga e’tibor bermaydi. U o‘zini, hayotni va go‘zallikni sevadi va buni Instagram sahifasidagi suratlardan ham bilish mumkin. Sitora 37 yoshda va yaqinda u muxlislari bilan yaxshi yangiliklarni bo‘lishishi shubhasiz.
Manzura
Shou-biznes vakillari orasida eng tajribalisi va musiqiy bilimga ega professional xonanda. Manzura uzoq yillar o‘zini musiqa va kuylashga baxshida qildi. Ko‘plab xit qo‘shiqlar yaratdi. Lekin shaxsiy hayot masalasida hanuz tinchlik. Xonanda shu vaqtgacha turmush qurishga jazm qilmadi, balki bunga arzirli sabablar bordir. Ustiga-ustak, u yaqindan boshlab efirlarda chiqishini ham to‘xtatdi va hozir ijtimoiy tarmoqlardagi do‘stlari bilan hamsuhbat bo‘lmoqda. Ma’lumot uchun, Manzura 1978-yil tavallud topgan.
Izoh (0)