Rani Mukerji Bollivudning eng mashhur aktrisalaridan biri sanaladi. Muvaffaqiyatli karyerasi davomida bir necha mukofotlar, jumladan, Filmfare Awards’ni ham qo‘lga kiritib ulgurgan Ranining hayoti bilan bog‘liq ma’lumotlarni e’tiboringizga havola qilamiz.
Aktrisa 1978-yil 21-mart kuni Mumbayda dunyoga kelgan. Otasi Ram Mukerji rejissor va Filmalaya Studios asoschilaridan biri, onasi Krishna Mukerji esa sobiq xonanda bo‘lgan. Akasi Raja Mukerji ham kinoprodyuser va rejissor sifatida faoliyat olib borgan. Xullas, Rani tom ma’noda san’at muhitida o‘sib-ulg‘aygan. Qolaversa, mashhur hind aktrisasi Kajol unga ota tomondan qarindosh, ssenariy muallifi va kinorejissor Ayan Mukerji esa amakivachchasi bo‘ladi.
1994-yilda 16 yashar Raniga Jugal Xansraj bilan birga “Aa Gale Lag Jaa” filmida suratga tushish taklif qilinadi. Ammo otasi qizini yosh bo‘la turib rol ijro qilishini istamaydi. Shu sabab uning o‘rnini Urmila Matondkar egallagan. Rani katta ekranda ilk bor 1996-yil “To‘y gullari” nomli bengal filmida epizodik rol bilan ko‘rinish bergan. Aynan shu yilning o‘zida Bollivudning “To‘y korteji” filmida suratga tushgan.
Amir Xon bilan birga “Tolega bo‘ysunmas” (Ghulam) filmida rol o‘ynaganidan keyin e’tibor markaziga tushgan, “Hayotda hamma narsa bo‘ladi”dan keyin esa so‘zsiz yulduzga aylangan. Shaxsiy hayotini muhokama qilishlarini yaxshi ko‘rmasligiga qaramay, aynan u hamisha OAV uchun mavzu bo‘lgan, jurnalistlar uni muhokama qilishdan charchamagan.
Ayni vaqtda rejissor Aditya Chopraning rafiqasi bo‘lgan Mukerji yoshligida suratga olish maydonchasidagi bir qancha hamkasblari bilan uchrashgan. Oilali Amir Xon ham Bachchanlar oilasining merosxo‘ri Abhishek ham qolmagan. Kichik Bachchan bilan munosabatlariga bo‘lajak qaynonasi Jaya Bachchan yoqtirmagani sabab barham berilgan.
https://www.instagram.com/p/BfY3nmdBhCq/
Bolalikdagi dugonasi Payal Khannaning turmush o‘rtog‘i Aditya Chopra bilan esa uzoq vaqt davomida yashirincha uchrashib yurgan. Keyinchalik esa juftlik turmush qurishga qaror qilgan. 2014-yil munosabatlarini nikoh bilan mustahkamlagan yulduzlarning oilasida 2015-yilda qiz farzand dunyoga kelgan. Adira tug‘ilganida aktrisa 37 yoshda bo‘lgan. Ayni vaqtda baxtli hayot kechirayotgan rejissor va aktrisa oilaviy munosabatlarni ko‘z-ko‘z qilish hamda OAV e’tiborini jalb qilishni istamaydi.
2006-yilda Raniga Gollivudning “Adash” (The Namesake) filmida suratga tushish taklif qilingan. Ammo grafik “Hech qachon alvido demang” (Kabhi Alvida Naa Kehna) filmining tasvirga olish jarayoni bilan to‘g‘ri kelib qolgani sabab Mukerji mazkur ishtirokdan voz kechgan. Shundan keyin rol aktrisa Tabuga nasib qilgan.
https://www.instagram.com/p/BgTX5zEAnWe/
Hind kinosanoatida faoliyat yuritadigan ayollardan faqatgina Rani bir yilda, bir vaqtning o‘zida “Eng yaxshi aktrisa” va “Eng yaxshi ikkinchi darajali aktrisa” sifatida Filmfare mukofotini qo‘lga kiritgan. Bunga u “Sen va men”( Hum Tum) hamda “Taqdir chorrahasi” (Yuva) filmlaridagi roli sabab erishgan.
Izoh (0)