Farg‘ona vodiysidagi temiryo‘l ustida uxlab qolgan mast erkak sabab katta tirbandlik kuzatildi, deya xabar bermoqda “O‘zbekiston temiryo‘llari” matbuot kotibi.
Qayd etilishicha, 2021-yil 4-avgust kuni Farg‘ona vodiysining Qo‘qon—Buvayda peregoni 7-kilometrining 5-piketida P–93-sonli Andijon—Toshkent yo‘nalishidagi yo‘lovchi poyezdi harakati 20 daqiqaga to‘xtagan.
Ma’lum qilinishicha, lokomotiv brigadasi temiryo‘l izlari ichi (koleya)da yotgan odamni ko‘rganidan so‘ng favqulodda tormozlashni qo‘llagan. Poyezd qo‘riqlanadigan temiryo‘l kesishmalaridan birining hududida to‘xtagan.
Oqibatda soat 21:50 dan 22:10 gacha ushbu joyda avtotransportlar tirbandligi yuzaga keldi.
Mazkur fuqaro mast holda bo‘lgani taxmin qilinmoqda. Favqulodda tormozlanish temiryo‘lda yotgan odam ustidan poyezd o‘tishining oldini olmagan, lekin uning tanasi po‘lat izlari orasida bo‘lgani bois unga hech nima qilmagan.
Yo‘lovchi poyezd texnik ko‘rikdan o‘tganidan so‘ng poyezd belgilangan yo‘nalish bo‘ylab harakatini davom ettirgan.
Bundan avval Qoraqalpog‘istonda IIB xodimi o‘zini temiryo‘l ko‘prigi ustidan tashlamoqchi bo‘lgan 18 yoshli yigitni qutqarib qolgani, Qashqadaryoda qaynotasi bilan tortishib qolgan kelin o‘zi va ikki farzandini poyezd tagiga tashlab, vafot etgani hamda Farg‘onada oilaviy janjal tufayli o‘zini poyezd ostiga tashlamoqchi bo‘lgan ayol qutqarib qolingani haqida xabar berilgandi.
Izoh (0)