Dunyo bo‘ylab koronavirus bilan kasallanish holatlarining ortishi munosabati bilan Xitoy hukumati o‘z fuqarolariga xorijga chiqish pasporti berishni vaqtincha to‘xtatadi. Bu haqda XXR Davlat migratsiya boshqarmasi chegara nazorati bo‘limi boshlig‘i Lyu Xaytaoga asoslanib, Sinxua agentligi xabar berdi.
Xitoyliklar faqat favqulodda holatlardagina mamlakatni tark etish uchun ruxsat olishi mumkin bo‘ladi. Hukumat boshqa davlatga safar qilish bo‘yicha berilgan arizalarni qat’iy tekshiradi. Lyu, shuningdek, Xitoyga olib kiriladigan tovarlar epidemiologik nazoratdan o‘tishi haqida ogohlantirdi.
Boshqa mamlakatdan Xitoyga kirib keluvchi har qanday turdagi transportda koronavirus izlari yoki infeksiya yuqtirganlar bor-yo‘qligi tekshiriladi. Chegara xizmatlari infeksiyaning XXRga kirishining oldini olish uchun noqonuniy migratsiya ustidan nazoratni kuchaytiradi. Shuningdek, Xitoy chegarachilari qo‘shni davlatlardagi hamkasblari bilan birgalikda kasallik tarqalishiga qarshi choralar samaradorligini oshiradi.
Xitoyning 25 ta shahrida, shu jumladan, poytaxt Pekin va Uxanda 400 ga yaqin odam COVID-19 yuqtirgan. Bu o‘tgan yili u yerda birinchi marta koronavirus avj olgan vaqtlardan buyon ilk marotaba kuzatilmoqda. Kasallikka chalinish holatlari 31 provinsiyaning 17 tasida aniqlangan.
Bir kun avval 71 ta mahalliy virus yuqish holati qayd etildi, bu yanvar oyidan buyon eng yuqori kunlik ko‘rsatkich. Kasallanish holatlarining deyarli yarmi aeroport klasteri joylashgan Szyansu shahriga to‘g‘ri keladi. Provinsiya hukumatlari aholiga o‘z hududlarini tark etmaslikni maslahat bermoqda.
Iyul boshida butun dunyoda delta shtamm tarqalayotgani oqibatida Xitoyda ham COVID-19 bilan kasallangan bemorlar ko‘paya boshladi. Koronavirus yuqtirib olish holatlari tufayli Xitoyning bir nechta shaharlarida aeroportlar yopildi, poyezdlar harakati cheklandi va karantin joriy etildi. Nankin shahrida deyarli barcha aholi, ya’ni 8,7 million kishidan koronavirusga test olindi.
Izoh (0)