“Roma” bosh direktori Tiagu Pintu Eldor Shomurodovning Rim jamoasiga qo‘shilgani haqida o‘z fikrlari bilan bo‘lishdi.

Foto: Getty Images

Eldor — ulkan salohiyatga ega hujumchi. U “Roma”da o‘zini ko‘rsatishni istaydi. O‘ziga avvaldan tanish bo‘lgan ligada buni uddalay oladi.

Bu xohish, shuningdek, Shomurodovning sifatlari Joze Mourinyoga mos keladi. Eldorni jamoada ko‘rib turganimizdan xursandmiz.

Tiago Pinto, “Roma” bosh direktori

Rim klubi Eldor Shomurodovni “Jenoa”dan 17,5 million yevro evaziga xarid qildi. Shomurodov “Roma” bilan 2026-yil 30-iyuniga qadar mo‘ljallangan shartnoma imzoladi. O‘zbekiston milliy terma jamoasi hujumchisi yangi klubi safida 14-raqamda harakat qiladi.

Shomurodov 2020/21-yilgi mavsum boshida “Rostov”dan 7,5 million yevro evaziga “Jenoa”ga o‘tgandi. Bungacha u “Mash’al” va “Bunyodkor” klublarida to‘p surgan. Eldor ortda qolgan mavsumda A Seriyada 31 ta o‘yin o‘tkazib, 8 ta gol urishga muvaffaq bo‘ldi.