Arnold Shvarsenegger ishtirokidagi “Terminator” va “Yirtqich”dan boshqa qiziqarli filmlar

2021-yilning 30-iyul kuni Arnold Shvarsenegger 74 yoshni qarshiladi. Gollivud yulduzi ijrosidagi qanday filmlar ko‘rishga arzigulik ekani haqida ma’lumot berib o‘tamiz.

“Qochish rejasi”, 2013

Aktyor filmografiyasidagi “Konan-varvar” (Conan the Barbarian). “Yirtqich” (Predator) bilan tanish bo‘lgan, “Xotiralar og‘ushida” (Total Recall) hamda “Haqiqiy yolg‘on” (True lies) klassikalarini ham allaqachon tomosha qilib ulgurgan muxlislarga “Qochish rejasi” filmini ko‘rish tavsiya qilinadi. Sujetga ko‘ra, aktyor gavdalantirgan qahramon dunyodagi eng yaxshi qo‘riqlanadigan “The tomb” (qabr) nomli qamoqxonadan qochmoqchi bo‘ladi. Bunda unga Silvester Stallonening qahramoni yordam beradi.

“Zararlangan”, 2014-yil

Arnold suratga tushgan 70 dan ko‘proq film orasida virus bilan bog‘lig‘i ham yo‘q emas. “Zararlangan” (Maggie) nomli filmda u xavfli virus bilan zararlanib, zombiga aylanib qolgan Meggi ismli qizning suyukli otasi rolini ijro qiladi. Aktyor gavdalantirgan qahramon qizidan o‘zini yakkalash o‘rniga, u bilan birga yashashda davom etadi.

“Egizaklar”, 1998

Shvarsenegger faqat jiddiy loyihalarda ishtirok etadi, deb o‘ylaganlar yanglishadi. U 1998-yilda komediya janrida tasvirga olingan “Egizaklar” filmida Denni De Vito bilan birga suratga tushgan. Aktyorlar mukammal inson yaratish bo‘yicha amalga oshirilgan irsiy eksperiment natijasida dunyoga kelgan egizaklarni gavdalantiradi. Ko‘rinishi umuman o‘xshamaydigan aka-ukalar bolaligidanoq bir-biridan ayro o‘sadi. Arnold alohida orolda tarbiyalanadiganJulius rolini ijro qiladi. Vinsent bolalar uyida katta bo‘ladi va u jismoniy hamda aqliy jihatdan mukammal Juliusdan  tamoman farq qiladi. Oradan 35 yil o‘tib ukasi borligidan xabar topgan Julius uni qidirishga kirishadi.

“Bolalar bog‘chasi politsiyachisi”, 1990

Aktyor ishtirokidagi yana bir komediya janridagi eng yaxshi filmlardan biri — “Bolalar bog‘chasi politsiyachisi” (Kindergarten Cop) 1990-yilning 21-dekabr kuni ekran yuzini ko‘rgan. Mazkur loyihada Arnold narkotik moddalar bilan savdo qiladigan odamning iziga tushgan politsiyachi rolini ijro qilgan. U jinoyatchining sobiq rafiqasidan bo‘lgan farzandi boradigan bog‘chaga tarbiyachi bo‘lib ishga kiradi. Jinoyatchilar bilan ishlash cho‘t bo‘lmagan politsiyachi bir gala mitti bolakaylarni qanday nazorat qilish mumkinligini bilmay boshi qotadi.

“Yugurayotgan odam”, 1987

Stiven Kingning romani asosida 1987-yilda suratga olingan “Yugurayotgan odam” (The Running Man) filmi voqealari 2017-yilda sodir bo‘ladi. AQSh hukumati tepasiga kelgan harbiylar aholining e’tiborini ichki muammolardan chalg‘itish uchun turli shoulardan foydalanadi. “Yugurayotgan odam” nomli shouda ozodlikdan mahrum qilingan kishilar ishtirok etadi. Ularning oldida ikkita yo‘l bo‘ladi: shafqatsiz sinovlardan o‘tib ozodlikka erishadi yoki tomoshabinlarning ko‘z o‘ngida ovchilar tomonidan o‘ldiriladi. Taqdir taqozosi bilan buyruqni bajarishdan bosh tortgan politsiya xodimi ham shouning ishtirokchilaridan biri bo‘ladi. Arnold ijrosidagi ushbu qahramon boshqa ishtirokchilar bilan raqobatlashish o‘rniga bunday shafqatsiz loyihani o‘ylab topganlardan o‘ch olish uchun tayyorgarlik ko‘radi.