AQSh hukumati Rossiyaga 3-sentabrgacha Amerikani tark etishi kerak bo‘lgan 24 nafar rossiyalik diplomat ro‘yxatini topshirdi. Bu haqda Rossiyaning Vashingtondagi elchisi Anatoliy Antonov The National Interest nashriga bergan intervyusida ma’lum qildi.
Antonov buni AQSh davlat departamenti 2020-yil dekabr oyida rossiyalik diplomatlarning xizmat safarini uch yillik muddat bilan cheklab qo‘ygani bilan izohladi. Rossiya elchisining ta’kidlashicha, bu diplomatlarning o‘rniga boshqa diplomatlarni olib kelish mumkin emas, chunki Amerika rasmiylari viza berish tartibini kuchaytirgan.
Antonovning ma’lum qilishicha, shuningdek, AQSh hukumati “hech qanday sabab ko‘rsatmasdan” diplomatlarning turmush o‘rtog‘i va farzandlarining vizalarini bekor qila boshlagan.
“Muddati tugagan vizalarning uzaytirilishini kechiktirish holatlari ham Rossiya diplomatik xodimlarini mamlakatdan siqib chiqarishga qaratilgan. Natijada, mening 60 ga yaqin hamkasbim (oila a’zolari bilan birga 130 kishi) hatto favqulodda gumanitar vaziyatlarda ham o‘z vataniga qayta olmaydi”, — dedi elchi.
Aprel oyida Vashington “Rossiya hukumati va razvedka xizmatlarining AQSh suvereniteti va manfaatlariga qarshi” harakatlariga javoban Rossiyaga qarshi yangi sanksiyalar joriy etdi. O‘shanda AQSh o‘n nafar rossiyalik diplomat chiqarib yuborilishini e’lon qildi. Amerika hukumatining fikricha, elchixona xodimlarining bir qismi Rossiya maxsus xizmatlarida ishlagan.
Rossiya xuddi shunday javob berdi va AQShni do‘st bo‘lmagan davlatlar ro‘yxatiga qo‘shdi. Bundan tashqari Rossiya AQSh diplomatik vakolatxonalariga Rossiya va uchinchi mamlakatlar fuqarolarini ma’muriy va texnik ishchilar sifatida yollashni taqiqladi. Shu munosabat bila davlat kotibi Entoni Blinken AQSh Moskva, Vladivostok va Yekaterinburgdagi Amerika konsulxonalarining 180 dan ortiq xodimini ishdan bo‘shatishga majburligini e’lon qildi.
Izoh (0)