“Daryo”ni Telegram’da o‘qing! Join!
18:53, 01.08.2021 45237

Dunyo bo‘yicha styuardessalarning eng chiroyli liboslari (foto)

Styuardessalar ishining murakkabligi, turli holatlarda qiyinchiliklar kelib chiqish mumkinligiga qaramay hamisha maftunkor va go‘zal ko‘rinadi. Kompaniyaning yuzi hisoblangan mazkur xodimlarning tashqi ko‘rinishi mukammal bo‘lishida ularning kiyimi ham muhim rol o‘ynaydi. Dizayni va qulayligi bilan o‘ziga xos bo‘lgan dunyodagi eng chiroyli formalar suratini e’tiboringizga havola qilamiz.

SkyUp

Foto: Marie Claire

Ukraina aviakompaniyasi styuardessalarining yuniformasi yorqin rangi va bichimi bilan o‘ziga xos sanaladi. Qayta dizaynlash bo‘yicha loyiha kuratori Olga Saregradskayaning aytishicha, asosiy maqsad — faol pozitsiyaga ega zamonaviy qiz obraz yaratishdan iborat bo‘lgan. SkyUp’ning yangi formasini ishlab chiqish uchun Ukrainaning ikki brendi taklif qilingan. GUDU dizayneri Lasha Mdinaradzade obrazning chizmasini chizgan, kostyumlar uchun maxsus andoza ishlab chiqqan. Shuningdek, obrazga kuz va yoz kolleksiyasidan palto qo‘shgan. GUNIA Project jamoasi esa styuardessalarning jaketi va paltosining yelka qismiga qadaladigan va aviakompaniya formasining ramziy belgisi hisoblangan shoyi ro‘moldagi printni ishlab chiqqan. Poshnali tuflilar esa qulay va harakatlanish oson bo‘lgan Nike krossovkalariga almashtirilgan.

Emirates

Foto: Marie Claire

Emirates — ushbu aviakompaniya nafaqat bekam-u ko‘st xizmat ko‘rsatishi, balki xodimlarning namunali tashqi ko‘rinishi bilan ham mashhurdir. 1997-yilda ishlab chiqilgan yuniformaga 2008-yilda biroz o‘zgartirish kiritilgan. Arablarning an’analariga xos elementni o‘zida mujassam qilgan obraz Britaniyaning Simon Jersey brendi tomonidan ishlab chiqarilgan. Undagi asosiy detal bosh kiyim va unga ulanib, yelkaning bir qismiga tashlanadigan ro‘mol hisoblanadi. Emirates vakillarining aytishicha, forma xizmat ko‘rsatishning yuqori darajasi va aviakompaniyaning tajribasiga urg‘u berishi, shuningdek, ekipaj a’zolari uchun qulay va tezkor harakatlanishi uchun o‘ng‘ay bo‘lishi kerak.

Qantas Airlines

Foto: Marie Claire

Avstraliyaning Qantas aviakompaniyasi ishchilarining kiyimi dunyodagi eng yaxshi formalardan biri sanaladi. Obrazni kelib chiqishi avstraliyalik bo‘lgan, Martin Grant brendi asoschisi Martin Grang tomonidan ishlab chiqilgan kiyimni rasmiy taqdimotda Victoria’s Secret modeli Miranda Kerr namoyish qilgan.

Air France

Foto: Marie Claire

Moda vatanlaridan biri bo‘lgan — Fransiya aviakompaniyasining formasi o‘ziga xos va bashang bo‘lmasligi mumkin emas edi. 60 yillarda Balenciaga va Dior brendlari tomonidan ishlab chiqilgan bo‘lsa, 2006-yilga kelib bu mas’uliyatli vazifani dizayner Kristian Lakrua o‘z zimmasiga olgan. Asos sifatida qora rangdan foydalangan dizayner, kapalak shaklidagi belbog‘ va qo‘lqop uchun yorqin qizil rangni tanlashni afzal bilgan.

Qatar Airways

Foto: Marie Claire

Qatar aviakompaniyasi xodimlarining libosi esa Olino kompaniyasi tomonidan ishlab chiqilgan. To‘q qizil va kulrang ranglardagi libos bir vaqtning o‘zida oddiy, ammo shu bilan birga bashang ko‘rsatadi. Ayollar uchun yubka va shim taqdim qilingan bo‘lib — parvoz davomida qay birida harakatlanish qulayligini xodimning o‘zi tanlaydi. Agar yubka tanlansa, u tizzadan tushib turishi va haddan ortiq tor bo‘lmasligi kerak. Shuningdek, ikki xil: poshnali va qulay poyabzal qo‘shib beriladi.

Turkish Airlines

Foto: Marie Claire

Turkiya aviakompaniyasi styuardessalarining libosi ustida Istanbulning go‘zalligi va serqirra ekanidan ilhomlangan milanlik dizayner Ettore Billotta ishlagan. U obraz yaratishda an’anaviy kalligrafiya va mozaikalarni ro‘mol va bo‘yinbog‘da mujassam etishga uringanini ta’kidlagan. Kulrang va to‘q qizil rangdagi libos komplekti: shlyapa, qo‘lqop, ro‘mol, kostyum, sumka va aksessuarlarni o‘z ichiga oladi.

Virgin Atlantic

Foto: Marie Claire

Ekipaj a’zolarining kiyimi dizayner Viven Vestvud tomonidan ishlab chiqilgan. 1940-yillar fransuz tendensiyalaridan ilhomlanib yaratilgan formaning ayollar uchun mo‘ljallangan variantiga 2005-yilda hoshiyali, oq kofta qo‘shilgan. Styuardessalar koftani plissirovkali yubka ichiga kirgizib, ustidan bel qismiga urg‘u berilgan jaket kiyadi. Erkaklar formasi esa Sevil-Rou uslubidagi kostyum shimdan iborat. Qolaversa, yuniforma ekologik talablarga ham javob beradi. Poliyester uchun ip qayta ishlangan plastik idishlardan ishlanadi.

American Airlines

Foto: Marie Claire

American Airlines xodimlarining klassik va oddiy formasi America West Airlines va US Airways qo‘shilganidan keyin yangilangan. Aslida undan avvalroq, 2016-yilda 80-yillardagi obrazga o‘zgartirish kiritishga qaror qilingan. Ammo bir necha oydan keyin ishchilar bosh og‘rishi, toshma toshishi va bezovtalikdan shikoyat qilgan. Shundan keyin Lands End tomonidan yangi kiyimlar ishlab chiqilgan. Barcha detallar: ip, tugmacha, zamok va boshqalarda xavfli kimyoviy moddalar ishlatilmasligiga e’tibor berilgan. Shundan keyin formaning rangi kulrangdan to‘q ko‘k rangga o‘zgargan. Urg‘u sifatida esa qizil rangdan foydalanilgan.

Singapore Airlines

Foto: Marie Claire

Singapur aviakompaniyasi xodimlarining obrazi esa 50 yildan buyon deyarli o‘zgarmagan. Fransuz dizayneri Pyer Balmen tomonidan 1968-yilda taqdim qilingan libos ustida ishlash davomida qulaylik bilan birga an’anaviylikka urg‘u berishga e’tibor qaratilgan. Uniforma sarong kebaya — milliy kostyumi motivi asosida yaratilgan. Asos uchun Pyer milliy naqsh tushilgan Malayziyaning batikli matosidan foydalangan.

China Eastern Airlines

Foto: Marie Claire

Fransuz dizayneri Kristian Lakrua omonidan ishlab chiqilgan libosda “shanhaycha uslub”, yevropacha bichim va fransuz modasining ta’sirini ko‘rish mumkin. Asos sifatida to‘q ko‘k matodan foydalangan Lakrua, qizil rang bilan obrazga urg‘u berishga harakat qilgan.

Virgin Australia

Foto: Marie Claire

“Podium loyihasi” shousi g‘olibi Juli Grbak tomonidan ishlab chiqilgan Virgin Australia formasi 2011-yilda rasman taqdim qilingan. Alvon va siyohrangning umumlashtirilgani kompaniya xodimlarining, hatto uzoqdan ham ko‘zga tashlanib turishiga sabab bo‘ladi. Dizaynerning aytishicha, formani tikib bitirish uchun atigi 7 oy vaqt ketgan.