Toshkent shahri Mirobod tumanida qizini sotib yubormoqchi bo‘lgan ayol qo‘lga olindi, deya xabar bermoqda shahar IIB axborot xizmati.
Qayd etilishicha, 2021-yilning 17-may kuni Mirobod tumani Avliyo ota ko‘chasida joylashgan kafelardan birida Toshkent shahar IIBB Terrorizm va ekstremizmga qarshi kurash boshqarmasi xodimlari tomonidan qo‘shni respublikalik 43 yoshli O. (ismlar o‘zgartirilgan) 13 yoshli qizini 3500 AQSh dollari evaziga sotmoqchi bo‘lganida qo‘lga olindi.
Ma’lum qilinishicha, bundan avval O. ismli ayol A. ismli qiz bilan tanishib qoladi. Suhbat davomida O. munosib ish topa olmayotgani, xonadoni ta’mirga muhtojligi, oziq-ovqatga puli yetmayotgani haqida aytadi va A.dan 13 yoshli qizini sotishda yordam so‘raydi.
Uyga qaytgach, A. yuqoridagi holat haqida tegishli organlarga murojaat qiladi.
Ertasi kuni O. va A. shahar kafelaridan birida uchrashgan va O. o‘smir qizini pulga sotayotgan vaqtida ichki ishlar organlari xodimlari tomonidan qo‘lga olingan.
Mazkur fakt bo‘yicha jinoyat ishi qo‘zg‘atildi. Jinoyatchiga nisbatan tegishli choralar ko‘rildi.
Bundan avval Surxondaryoda 1 yoshli qizini 12,6 million so‘mga sotishga uringan ayol qo‘lga olingani, Qashqadaryoda 4 yoshli o‘g‘lini 25 million so‘mga sotishga uringan ona va uning sherigi ushlangani hamda Toshkentda 1 yoshli farzandini 5 ming dollarga sotishga uringan er-xotin ushlangani haqida xabar berilgandi.
Izoh (0)