Pul futboldan ustun kelganda. Faoliyatining eng yuqori nuqtasida Yevropadan ketgan futbolchilar

Xitoy, Amirliklar, AQSh… Ishtiyoqini yo‘qotgan futbolchilar shu mamlakatlarga ketadi. U yerda futbol darajasi past bo‘lsa ham, yaxshi maosh to‘lanadi. Kimdir faoliyati so‘ngida u yerga boradi, kimdir esa faoliyatining eng yuqori nuqtasida. Quyida Yevropani erta tark etgan 8 futbolchi haqida hikoya qilinadi.

8. Antoni Modest — 33 yosh. Xitoy (2016-2017)

XXI asrning 10-yillarida Antoni Modest “Kyoln” jamoasi muxlislarining sevimli futbolchisi edi. Hujumchi faoliyati boshida “Nitssa”, “Anje”, “Bordo” va “Bastiya” jamoalarida to‘p surib, o‘rtacha natija qayd etgan. 2013-yilda Antoni Germaniyaning “Hoffenhaym” jamoasiga o‘tdi. U yerda ham o‘rtacha o‘yin namoyish etgan futbolchiga “Kyoln” qiziqish bildirdi. Modest u yerda porladi. 2 mavsumda 68 ta o‘yinda ishtirok etib, 40 ta gol urdi. Jamoa muxlislari nihoyat ajoyib futbolchiga ega bo‘lganidan juda xursand edi. Lekin boyvachcha xitoyliklar keldi va hujumchini o‘zlarining chempionatiga olib ketdi. Xitoyda 2 mavsum to‘p surgan fransuz futbolchisi yana “Kyoln”ga qaytdi. Bu safar u avvalgi Antoni emasdi: 2 yilda 10 ta o‘yinda ishtirok etdi. Xitoy futbolchining muvaffaqiyatli faoliyatiga nuqta qo‘yishi mumkinligining yaqqol isboti.

7. Ramires — 34 yosh. Xitoy (2016—2019)

Braziliyalik — o‘ninchi yillarning birinchi yarmida tayanch zonaning etalonlaridan biri edi. 2010-yilda “Chelsi” Ramiresni xarid qildi. “Aristokratlar” safida futbolchi qo‘lga kiritish mumkin bo‘lgan barcha sovrinlarni, shu jumladan, 2012-yilda Chempionlar Ligasini ham yutdi, Braziliya terma jamoasidan chaqiruv oldi. Lekin 28 yoshida Ramires Xitoydan taklif oladi va u yerga ketishga qaror qiladi. Xitoydagi 2 mavsumidan so‘ng yarim himoyachi jamoasiz qoladi. 2019-yilda “Palmeyras” futbolchiga boshpana berishga rozi bo‘ladi. Ramires o‘z yurtida Libertadores Kubogini qo‘lga kiritadi, lekin Braziliyadagi 3 yil doimiy zaxiradan maydonga tushishlar, kam o‘yin amaliyoti bilan yodda qoldi. 34 yoshli Ramires hech kimga kerak bo‘lmay qoldi va hozirda erkin agentga aylangan.

6. Yannik Karrasko — 27 yosh. Xitoy (2018-2019)

Faoliyatining ilk yillarida Yannik Ferreyra Karrasko “Monako”da ajoyib o‘yin namoyish etdi. Fransiyadagi uch mavsumi mobaynida belgiyalik iqtidor egasi asosiy tarkib futbolchisiga aylandi. Diyego Simeone futbolchini “Atletiko Madrid”ga o‘tishga ko‘ndiradi. Karrasko Madrid jamoasida qanotda harakat qildi va almashtirib bo‘lmas futbolchiga aylandi. 2018-yilda xitoyliklar futbolchiga taklif bilan chiqdi va Yannik Jahon Chempionatidan avvalroq ularning taklifini qabul qildi. “Dalyan Pro”da ham kuchli futbol namoyish etgan Karrasko rahbariyat bilan nizolashib qoladi va ikkinchi mavsumining oxirida Xitoyni tark etib, “Atletiko”ga qaytadi. Yannik 2020/21-yilgi mavsumda “Atletiko” safida chempionga aylandi va gol+pas tizimida 16 ochko jamg‘ardi. Karrasko o‘z vaqtida Xitoydan keta oldi.

5. Xalk — 34 yosh. Yaponiya (2005—2008), Xitoy (2016—2020)

Xalk — noyob futbolchi. Braziliyalik faoliyatini Yaponiyada boshlagan. U yerdagi muvaffaqiyatli faoliyatidan so‘ng “Portu”ga o‘tgan. Portugaliya jamoasi safida butun dunyo uning uzoqdan beradigan kuchli zarbalarini tomosha qildi. Terma jamoadan chaqiruv olgan Xalk endi “Liverpul” yoki “Barselona”ga o‘tishi kutilgandi. Ammo futbolchi Rossiyaning “Zenit” jamoasini tanladi. Sankt-Peterburgliklar safida omadli faoliyat olib borayotgan Xalk xitoyliklar nazariga tushadi. Xalk o‘ylab o‘tirmasdan Xitoyga yo‘l oladi. Osiyoda faoliyati ko‘ngildagidek o‘tmagan futbolchi 2021-yilda Braziliyaga qaytadi. “Atletiko Mineyro” a’zosi bo‘lgan Xalk top-5 chempionatlaridan birortasida o‘ynamadi. Shunga qaramasdan qaysi jamoada to‘p surgan bo‘lsa, o‘sha jamoa afsonasiga aylana oldi.

4. Karlos Vela — 32 yosh. AQSh (2018-yildan hozirgacha)

Karlos Velani Janubiy Amerikada porladi deb aytib bo‘lmaydi. Vela noyob iqtidor egasi edi va bu uning 2008-yilda “Arsenal” safiga o‘tishiga zamin yaratdi. APLda unga oson bo‘lgani yo‘q, meksikalik futbolchi chempionat tanlashda adashgandi. Beshafqat va kuchli Angliya Premyer Ligasi Karlosga o‘zining salohiyatlarini ko‘rsatishga yo‘l qo‘ymadi. Angliyadagi 3 yillik faoliyatidan so‘ng Vela Ispaniyaga ketishga majbur bo‘ldi. “Real Sosyedad”dagi ilk mavsumidayoq Karlos asosiy tarkib futbolchisiga aylandi va gol+pas tizimida 20 ochko to‘plashga muvaffaq bo‘ldi. Vela jamoani oldinga boshlardi va asosiy yulduzga aylandi. “Sosyedad”dagi 6 yillik faoliyatidan so‘ng Karlos MLS’ga o‘tdi. “Los-Anjeles” safida ham Karlos Vela yetakchiga aylandi. Hozirda 32 yoshda bo‘lgan Vela boshqa jamoaga o‘tish haqida o‘ylayotgani yo‘q.

3. Sebastyan Jovinko — 34 yosh. MLS (2015—2018), Saudiya Arabistoni (2018-yildan hozirgacha)

“Empoli”dagi ajoyib o‘yinlari Sebastyan Jovinkoning “Yuventus”ga o‘tishiga sababchi bo‘ldi. Turinda Sebastyanning ishlari yurishmadi, jamoa darajasi u uchun yuqorilik qildi. Shuning uchun 2010-yilda futbolchi “Parma”ga o‘tdi. A Seriyaning o‘rtamiyona jamoasida Jovinkoning o‘yini ochilib ketdi: 70 o‘yinda 40 golli vaziyatlarda qatnashdi. Jamoa muxlislari futbolchini yaxshi ko‘rardi va hech qayerga ketishini istamasdi. Ammo “keksa sinyora” Jovinkoni qaytarib olishni xohlab qoldi. Shu tariqa Sebastyan 2012-yilda “Yuventus” safiga qaytdi. 2015-yilda esa MLS’ga yo‘l olishga qaror qildi. “Toronto” safida faoliyat olib borgan futbolchi 2018-yilda shartnomasi yakuniga yetgach, Saudiya Arabistonining “Al-Hilol” jamoasiga borib qo‘shildi. Sebastyan Jovinkoning Italiyaga qaytishi borasidagi mish-mishlar tinmayapti, ammo bunga ishonish qiyin.

2. Aleks Teysheyra — 31 yosh. Xitoy (2016—2020)

Teysheyra Donetskning “Shaxtyor” jamoasiga yoshligidanoq qo‘shilgandi. Ukraina jamoasi o‘sha vaqtlarda ham braziliyalik futbolchilarni xarid qilib, ularni katta narxlarga sotish bilan shug‘ullanardi. Fernandinyo, Duglas Kosta, Villian, Luis Adriano kabi futbolchilar shular jumlasidan. 2015/16-yilgi mavsumda “Liverpul” Teysheyrani xarid qilish uchun “Shaxtyor” bilan bog‘lanadi. Ammo Aleks negadir bu taklifga e’tibor qilmasdi. Bunga esa sabab bor edi. 2016-yilda xitoyliklar “Shaxtyor”ga juda katta pul to‘laydi va futbolchining o‘zini ham “rozi qiladi”. Aleks Xitoyga ketishga qaror qiladi. 2020-yilda esa shartnomasi yakuniga yetgan futbolchi erkin agentga aylandi va hozircha hech kim “Szyansu Sunin” taklif qilganchalik shartnoma taklif qilmayapti.

1. Oskar — 29 yosh. Xitoy (2017-yildan hozirgacha)

Oskar “Chelsi” safida porlagan braziliyalik futbolchilardan biri. U Chempionlar Ligasida debyut o‘yinidayoq “Yuventus” darvozasiga ikkita gol urib, YChL tarixida dublga erishgan eng yosh futbolchiga aylangan edi. Braziliya terma jamoasi va “Chelsi”ning asosiy tarkibi vakili futbol uchun ideal yoshida Xitoyga ketdi. “Shanxay SIPG” uning keyingi jamoasiga aylandi. Xitoyda uning faoliyati turg‘un holatda kechdi. Hozirga kelib u Chin yurtini tark etish istagida, biroq Yevropaga qaytganda ham yangi jamoasi “Chelsi” darajasida bo‘lmasligi aniq.