Farg‘ona viloyatida o‘qishga kiritish bilan bog‘liq firibgarlik holati aniqlandi, deya xabar bermoqda Bosh prokuratura huzuridagi Departament matbuot xizmati.
Ma’lum qilinishicha, Departamentning Farg‘ona viloyati boshqarmasi tomonidan o‘tkazilgan tezkor tadbirda Marg‘ilon shahridagi umumiy o‘rta ta’lim maktabi o‘qituvchisi Sh.Q. yuqori lavozimda ishlovchi tanishlari orqali fuqaro S.ga Qirg‘izistonning Jalolobod davlat universitetining 1-kursini tamomlagani haqida ma’lumotnoma olib berish va ushbu ma’lumotnoma orqali Farg‘ona politexnika institutiga o‘qishga kiritib qo‘yishni va’da qilgan.
Buning evaziga fuqarodan 2000 AQSh dollarini firibgarlik yo‘li bilan olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval Surxondaryo va Farg‘onada fuqarolarni o‘qishga kiritib qo‘yish evaziga pul so‘ragan talabalar ushlangani, Qoraqalpog‘istonda 23 ming dollar evaziga Qoraqalpoq davlat universitetiga o‘qishga kiritib qo‘yishni va’da qilgan shaxs ushlangani hamda Toshkentda fuqaroning Qozog‘istondagi o‘qishini Samarqand tibbiyot institutiga ko‘chirib berish evaziga 5 ming dollar olgan shaxs ushlangani haqida xabar berilgandi.
Izoh (0)